Битолчанец исчезна: последен контакт од Штип, семејството апелира за помош

Жителот на Битола, Злате Дургутовски, е исчезнат од петокот, 21 август, околу 19:05 часот, објавија членови на семејството. Од тој момент немаат никаква информација каде се наоѓа.

Според сопругата, тој излегол без телефон и без пари, по што семејството очајно се обидува да утврди каде би можел да биде.

Во неделата навечер семејството добило информација дека Злате е во Штип и дека има повредена и/или имобилизирана нога и му е потребна помош за превоз до Битола. Следниот ден тој повторно се јавил и побарал сопругата да дојде по него заедно со нивните две мали деца.

Од вторникот нема комуникација

Поради тешката финансиска состојба, немањето средства за превоз и сместување и грижата за децата, сопругата не успеала да отпатува кон Штип. Од вторникот Злате повторно не се јавувал и семејството е во очај.

„Очајно го бараме само да се јави, за да му организираме превоз и да се врати дома. Двете мали деца го чекаат“, наведува сопругата во апелот.

Семејството ги повикува сите граѓани кои можеби го забележале во Штип, во околните населени места или во друг град да пријават во полиција или да помогнат во воспоставување на контакт. Доколку некој дојде во контакт со него, да му овозможи да се јави на 078/550-521, за семејството да може да организира превоз и да го врати безбедно во Битола.

Фото: прес-материјал од настанот