Блокадата на Црното Море закана за украинскиот аграр

Украинските земјоделци се соочуваат со растечки проблеми откако извозот на жито и други аграрни производи преку пристаништата на Црното Море е речиси стопиран по серија напади ова лето. Во јули и почетокот на август Русија изврши повеќе од 70 напади врз украинската пристанишна инфраструктура и 62 напади врз пловила, што го парализираше морскиот транспорт.

Извозот се намали токму во најважниот момент

Поради ударите, извозот на жито во првите две недели од август е намален за 75 отсто на годишно ниво. Ова се случува во критичниот период на жетва: магацините се полнат, а домашните цени на житото паѓаат и кај дел од земјоделците се под трошоците за производство.

Тоа ја загрозува можноста на земјоделците да ги финансираат есенската сеидба, да набават гориво и други инпут‑материјали и да ги платат работниците. Украинската централна банка проценува дека блокадата би можела да ја чини земјата околу 2,5 милијарди долари во девизни приходи до крајот на годината.

Киев бара алтернативни извозни маршрути преку железница, патишта и Дунав, но тие се ограничени: трговските услови со ЕУ се покомплицирани, нивото на Дунав е ниско, а руските напади ги оштетуваат и железничките коридори.

Земјоделците предупредуваат дека ако не успеат да ја продадат годинашната реколта и да обезбедат средства за новата сеидба, последиците би можеле да се почувствуваат и следната година, со ризик од поширока прехранбена криза доколку затнувањата продолжат.

Фото: прес-материјал од настанот