Британската влада го ажурира 'War Book' и ги повикува граѓаните да се подготват

Британската влада почна да изработува нов план за дејствување во случај на сериозна национална криза или воена закана и ги повикува домаќинствата да се подготват за можни големи нарушувања во секојдневниот живот.

Властите ги охрабруваат граѓаните да складираат храна, вода за пиење и основни залихи додека се ажурира таканаречениот „War Book“ — клучен документ кој ги дефинира чекорите што државата треба да ги преземе во екстремни услови, а кој не бил прегледан со децении.

За сериозноста на заканата предупреди и началникот на британскиот Генералштаб, Сер Ричард Најтон, кој рече дека опасноста од Русија го прави овој период „најопасен“ во неговата 35-годишна воена кариера.

Асиметрични напади и целна инфраструктура

Експертите нагласуваат дека потенцијалната закана можеби нема да изгледа како класична инвазија, туку ќе доаѓа во асиметрични форми. Историчарката Маргарет Мекмилан истакнува: „Почнуваме да сфаќаме дека војната е нешто што ни е поблиску отколку што би сакале да мислиме“, споредувајќи ја сегашната атмосфера со летото 1914 година кога за многумина конфликтот изгледал речиси незамисливо.

Пензионираниот генерал Сер Ричард Ширеф смета дека Русија уште од 2014 година води асиметрична војна против НАТО. Тој предупреди: „Реалноста е дека Русија верува дека е во конфликт со НАТО уште од 2014 година. Тоа не е конвенционална војна, туку стратешко поткопување на интегритетот на земјите од Алијансата. Не е незамисливо Русите да се обидат да го дестабилизираат НАТО, на пример преку обид за преземање контрола врз Шпицберген во норвешкиот архипелаг Свалбард.“ Експертите посочуваат дека напади врз критична инфраструктура — пресекување на подводни кабли или сајбер-напади врз клучни државни системи — се меѓу најверојатните сценарија.

Американскиот професор по стратешки студии Ендру Михта предупреди дека по Студената војна Европа ја загуби чувствителноста за непосредна закана: „Велика Британија е во голема мера воено, но и ментално разоружана. Нема подготвеност бидејќи политичките елити не ѝ се обраќаат на јавноста на начин што искрено би ја прикажал сериозноста на ситуацијата“, рече Михта, како пример посочувајќи долготрајните резови во одбранбените буџети во некои земји.

Експертите како пример за поголема отпорност ги истакнуваат нордиските држави. По влезот во НАТО во 2022 година, Шведска ја зајакна делумната регрутација и цивилната заштита; Финска, која дели граница од 1.287 километри со Русија, одржува задолжителен воен рок за мажите, има над еден милион обучени резервисти и може брзо да мобилизира околу 280.000 војници. За споредба, британската армија се потпира на околу 70.000 активни припадници. Генералот Ширеф смета дека Британија сериозно треба да размисли за воведување поширока регрутација или задолжителна служба по моделот на Норвешка, каде голем дел од матурантите поминуваат едногодишна воена обука пред да продолжат на факултет или на пазарот на труд.

Фото: пиксабеј