Бугарија ја ограничува домашната ракија — 30 литри без акциза, забрана за послужување во деловни простории
Парламентот на прво читање ги ограничи производството и послужувањето на домашна ракија со цел контрола на акцизата и продажбата.
Парламентарните промени во даночниот закон во Бугарија, изгласани на прво читање, го ограничуваат начинот на производство, поседување и нудење на домашна ракија. Предложените правила дозволуваат одредено количество без акциза, но ставаат ограничувања за јавни и деловни простории.
Клучни одредби
Според предлог-законот, секое домаќинство може да произведе до 30 литри ракија без да плати акциза, но произведениот алкохол мора да остане на приватниот имот. Поседувањето, нудењето и продажбата се забрануваат во простории поврзани со вршење економска дејност, како ресторани, хотели, пансиони, автосервиси и магацини. На лични имоти и во подруми поседувањето не се забранува.
Измените предизвикаа реакции меѓу пратениците од опозицијата кои предупредуваат дека формулацијата е прекумерно широка и може да доведе до апсурдни ситуации.
Претседателот на „Продолжуваме со промената“, Асен Василев, предупреди дека според ваквата формулација, дедо кој ќе донесе домашна ракија на свадба на внукот во ресторан би можел да го прекрши законот.
Реагираше и Цончо Ганев од „Преродба“, посочувајќи: „Доколку во сервис за автомобили има шише ракија од 50-100 грама, тоа ќе биде предмет на заплена и извештај“, коментираше тој.
Претседателот на ГЕРБ, Бојко Борисов, ги критикуваше даночните измени и оцени дека властите посегнуваат по традиционалните навики на граѓаните. Засега нема најави од мнозинството дали спорните одредби ќе бидат прецизирани пред второто читање.
Фото: прес-материјал од настанот
