Почетна
Македонија

Четири мечки упаднаа во пчеларник во Дихово и уништија повеќе пчелни семејства

Снимката покажува мечки како влегуваат меѓу кошниците во пчеларникот на Јовчевски; пчеларите велат дека мечките од Пелистер се сè почеста закана.

·Македонија
Четири мечки упаднаа во пчеларник во Дихово и уништија повеќе пчелни семејства

Камерите во пчеларникот на Нацо Јовчевски во битолското село Дихово снимија како четири мечки влегуваат меѓу кошниците и предизвикуваат штета, при што повеќе пчелни семејства беа уништени.

На снимката се гледаат животните како се движат меѓу рамките, превртуваат опрема и прекинуваат со работата на кошниците. Пчеларите велат дека загубите се големи: неколку семејства се уништени, а некои кошници се оштетени до степен на непреправливост.

Пчеларите го посочуваат проблемот со мечките и климатските промени

“Потребата за храна повторно ги спушти мечките во потпелистерските села. Во ова несекојдневно видео можете да видите како дури ЧЕТИРИ МЕЧКИ влегуваат во еден од нашите пчеларници и прават огромна штета, уништувајќи голем број пчелни семејства. Зад секое пчелно семејство стојат години труд, љубов и безрезервна посветеност. За нас ова не се само бројки и загубена опрема, туку уништена мака и грижа“ вели Јовчевски, кој повеќе од десет години, покрај со производството на мед и пчелни производи, се занимава и со апитуризам.

Пчеларите од регионот се жалат дека покрај климатските промени и намалените приноси, пелистерските мечки често слегуваат до потпелистерските села и ги напаѓаат пчеларниците. За малите производители, чие производство многу зависи од природните услови, ова е дополнителен и растечки предизвик.

Пчеларската заедница посочува дека загубите не се сведуваат само на изгубена опрема и мед — секое уништено пчелно семејство значи години вложен труд и инвестиција, а обнова по такви настани бара време и средства.

Фото: прес-материјал од настанот

Поврзани написи