Katër vende të BE kërkojnë rishqyrtim të pasurive ruse të ngrira për financimin e Ukrainës

Holanda, Polonia, Spanja dhe Suedia i kanë kërkuar Komisionit Evropian të rishikojë mundësinë e përdorimit të pasurive shtetërore ruse të ngrira për të financuar Ukrainën. Katër vendet i dërguan një letër të përbashkët Përfaqësueses së Lartë të BE për Politikë të Jashtme dhe Siguri, Kaja Kallas, dhe ministres së Jashtme të Irlandës, Helen McEntee, para një takimi joformal të diplomatëve të BE-së.

Në letër kërkohet që Komisioni të shqyrtojë "opsione të reja" që do t’i lejojnë pasuritë e ngrira ruse të shërbejnë si themel për mbështetje ndaj Kievit, duke siguruar që rreziku dhe çdo humbje të shpërndahet drejtësisht midis shteteve anëtare. Katër vendet pranojnë kompleksitetin ligjor dhe politik të çështjes, por theksojnë se barra nuk duhet t’i bjerë në mënyrë disproporcionale një vendi të vetme.

Pengesat politike dhe ekonomike

Rreth 210 miliardë euro pasuri shtetërore ruse janë të ngrira brenda Bashkimit Evropian, ku pjesa më e madhe mbahet në depozitarin belg Euroclear. Propozimi për të përdorur pjesë të këtyre pasurive si bazë për një hua të madhe për Ukrainën është diskutuar tashmë nga udhëheqësit e BE-së, por nuk u arrit konsensus për shkak të kundërshtimit të Belgjikës.

Autoritetet belgase kanë paralajmëruar për pasoja të mundshme ligjore dhe financiare dhe kanë nxjerrë në pah rrezikun e hakmarrjes nga Rusia, duke kërkuar garanci nga shtetet e tjera anëtare për mbulimin e humbjeve të mundshme. Në vend të kësaj, BE vendosi të ofrojë një hua prej 90 miliardë eurosh për Ukrainën, që do të paguhet brenda 18 muajve të ardhshëm me kusht që Kievi të zbatojë reformat e dakorduara.

Nisma e katër vendeve rikthen presionin brenda bllokut për të gjetur mekanizma shtesë financimi për Ukrainën, teksa lufta që nisi më 24 shkurt 2022 vazhdon të sfidojë kapacitetet politike dhe financiare evropiane.

Foto: material shtypi nga ngjarja