ЦУК: 22 пожари на отворено — 8 сè уште се активни

Според последниот извештај на Центарот за управување со кризи (ЦУК), до 18 часот денеска во земјата се регистрирани вкупно 22 пожари на отворен простор: 8 се активни, 3 се под контрола, а 11 се изгаснати.

Активни пожари има во Општина Студеничани кај селата Моране, Вртекица и Рамни Габер каде гори мешана шума. Во Општина Македонски Брод пожарите го зафатиле Драгов Дол и Локвица, каде гори ниска вегетација, нискостеблеста шума и грмушки.

Во Општина Прилеп е активен пожарот кај селото Чаниште; од надлежните се наведува дека има крак кон селата Крушевица и Лопатица, како и крак кон Црна Река и кон селото Орле во Општина Новаци, каде гори ниска вегетација.

Други жаришта и под контрола

Покрај тоа, грмушки, стрниште, ниска вегетација и ѓубре гори кај селата Тајмиште и Горно Строгомиште во Општина Кичево, кај гостиварското село Тумчевиште, во селото Стримница во Општина Желино и на депонијата Буково во Охрид.

Под контрола се пожарите во Општина Гевгелија кај селата Прдејци и Смоквица (сува трева, трње и напуштени ниви), во Општина Гостивар кај селата Ѓоновица и Симница (ниска вегетација и грмушки) и депонијата кај Делчево. Од ЦУК дополнително информираат дека во повеќе општини веќе се изгаснати пожари каде гореле ниска вегетација, мешана шума, сува трева, трње и ѓубре.

Локалните власти оценуваат дека селото Чаниште моментално е безбедно, но пожарникарите ќе мораат да водат повеќедневна битка за целосно да се стават под контрола сите жаришта и да се спречат повторни активирања.

Фото: прес-материјал од настанот