ЦУК: 37 пожари на отворено во изминатото деноноќие, три се и понатаму активни

Центарот за управување со кризи (ЦУК) соопшти дека во изминатото деноноќие, заклучно до 7:30 часот утрово, на територијата на државата се регистрирани вкупно 37 пожари на отворен простор. Од нив три и понатаму се активни, еден е ставен под контрола, додека останатите 33 се изгаснати.

Каде гори и каков е обемот

Меѓу активните е пожарот кај селото Чаниште во прилепско, кој вчера попладне се прошири на два крака — еден кон селото Зовиќ, а другиот кон селото Крушевица — зафаќајќи ниска вегетација. Дирекцијата за заштита и спасување соопшти дека линијата на огнената стихија беше на средина меѓу двете села и достигнувала должина од неколку километри, поради што во справувањето беа ангажирани противпожарни екипи од неколку градови.

Активни се и пожарите на територијата на општина Студеничани, на потегот меѓу селата Моране, Вртекица и Рамни Габер каде гори мешана шума, како и огнените жаришта кај местото Видуш и селата Драгов Дол и Локвица во општина Македонски Брод. Во овие места огнот зафатил ниска вегетација, нискостеблеста шума и грмушки.

Пожарот на депонијата во Делчево, кој гори неколку дена, утрово е ставен под контрола, информираше ЦУК.

Од изгаснатите пожари, два биле на територија на општина Ѓорче Петров, два во регионот на Сарај, два во Штип, по три во Долнени, Кичево и Гостивар, по еден во Аеродром, Арачиново, Могила, Новаци, Радовиш, Струмица, Чашка, како и пожари што беа на територија на Велес и на Зелениково.

Противпожарните екипи успеале да ги изгаснат и пожарите во Виница, Кочани, Липково, Кратово, Старо Нагоричане, Ранковце, Брвеница, Тетово и Јегуновце, кој беше проширен и во скопскиот регион каде зафати дел од општина Сарај.

Фото: Дирекција за заштита и спасување