ЦУК: Седум активни пожари на отворено, три се под контрола

Центарот за управување со кризи (ЦУК) информира дека до 18:30 часот седум пожари на отворен простор се активни, додека некои од пожарите низ земјата се веќе изгаснати или ставени под контрола.

Каде се случуваат и каква е состојбата

Според ЦУК, од регистрираните 17 пожари три се ставени под контрола, а седум се изгаснати. Меѓу активните пожари е пожарот во Општина Сарај кај селата Радуша и Копаница, каде гори нискостеблеста шума и ниска вегетација.

Активни се и огнови над селото Нежилово во Општина Чашка каде гори ниска вегетација и единечни дрва; во Општина Боговиње кај селото Урвич гори нискостеблеста шума; и во Општина Штип помеѓу селата Селце, Пухче, Степанци и Лакавица.

Дополнителни активни пожари се пријавени помеѓу селата Барбарево и Стиник во Општина Ново Село, каде гори ниска вегетација и мешана шума; кај селата Долна Белица, Вишни и Октиси во Општина Струга со стрниште и ниска вегетација; и во Општина Прилеп во близина на дата-центар каде гори ниска вегетација и ѓубре.

ЦУК информира дека под контрола се пожарите во општините Гостивар и Македонски Брод каде гори нискостеблеста шума, ниска вегетација, пасишта и папрат, како и пожарот на градската депонија во Општина Делчево и пожарот над селото Палиград во Општина Зелениково.

Претходно, директорот на Дирекцијата за заштита и спасување (ДЗС), Стојанче Ангелов, изјави дека од околу дваесетина пожари на отворен простор најголемиот дел се изгаснати, а некои се ставени под контрола, и ја посочи како позитивна вест веста дека големиот пожар што пред три дена изби на подножјето на Пелистер е ставен под целосна контрола.

„Ова го сметам за еден од најголемите успеси ова лето, бидејќи гасењето на ваков пожар којшто се одвиваше над некои делови низ борова шума е просто неверојатно. Уште еднаш упатувам голема благодарност до сите коишто учествуваа во гаснењето и ставањето под контрола на овој пожар. Се надевам дека контролата којашто ја воспоставивме ќе ја одржиме и во текот на денешниот ден, а во текот на ноќта ќе се работи повторно сантиметар по сантиметар, метар по метар во внатрешноста на пожарот за да се направи негово целосно гаснење“, вели Ангелов во попладневната видеоизјава.

Фото: прес-материјал од настанот