Депонијата „Буково“ повторно опожарена, жителите на Крушје се гушат во чад

Повторно избувна пожар на депонијата „Буково“ во охридскиот регион, а густите чадни слоеви ги засегнаа жителите од околните села, особено Крушје, кои велат дека ги затвораат прозорците и не можат да дишат нормално.

Екипите работат на задушување на жариштата

На терен интервенираа противпожарни екипи и комунални служби кои копаат низ слоевите отпад и го покриваат местото со земја за да ги привремено задушат жариштата и да спречат понатамошно проширување на оганот.

Од ЈП Комуналец информираа дека во интервенцијата учествувале екипи на претпријатието, припадници на Територијалната противпожарна единица од Охрид, како и цистерна на јавното претпријатие. Жителите од Крушје велат дека секое повторно палење значи директна загрозеност по нивното здравје.

„На депонијата е направен пресек со цел да се спречи ширењето на пожарот кон останатиот дел од депонијата. Континуирано се носи и дополнителни количини на земја, која се користи за покривање и задушување на жариштата, согласно состојбата на терен и потребите од интервенцијата. На овој начин се преземаат дополнителни мерки за целосно задушување на пожарот и спречување на негово повторно активирање.Екипите остануваат на терен за следење на состојбата и навремено реагирање." информараат од охридски Комуналец.

Активистите од „Збогум Буково“, кои со години повикуваат на редовна превенција и затворање на депонијата, повторно истакнуваат дека причината за повторените пожари е несоодветното третирање на отпадот.

Драгана Карашова, активист на "Збогум Буково", побара итни мерки и побрзо спроведување на плановите за преиспитување на локацијата.

Како долгорочно решение се наведува изградбата на регионалниот центар за отпад во Новаци; властите соопштија дека проектот тече според предвидената динамика и дека до крајот на 2027 година ќе се затворат проблематичните депонии во Југозападниот регион, вклучително и Буково.

Фото: прес-материјал од настанот