Директорот ќе може да биде разрешен поради негативен ревизорски извештај

Предлог‑измените на Законот за катастар и недвижности ги менуваат правилата за именување и разрешување на раководните лица во Катастарот, воведувајќи ревизорски извештај како формален основ за отстранување и ускладување со Законот за високи раководители.

Со измените се укинуваат посебните процедури што досега важеа за јавен оглас и селекција на директор и заменик‑директор и тие ќе се именуваат преку единечната постапка предвидена во Законот за високи раководители, при што кандидатите треба да ги исполнуваат условите утврдени со тој закон. Иста усогласеност се предвидува и за членовите на Управниот одбор.

Една од клучните новини е што претседателот и членовите на Управниот одбор би можеле да бидат разрешени доколку се утврди дека при извршувањето на функцијата лично или заедно со друг член дејствувале спротивно на основните цели на Законот за катастар на недвижности. Таквото постапување може да се утврди врз основа на ревизорски извештај за степенот на постигнување на законските надлежности на Агенцијата.

Ревизорски извештај како основ за разрешување

Како дополнителен основ за разрешување се предвидува и нестручно, непрофесионално и несовесно извршување на функцијата во областа на материјалното и финансиското работење, доколку тоа е констатирано во ревизорскиот извештај. Предлог‑законoт предвидува и посебни услови под кои директорот и заменикот на директорот би можеле да бидат разрешени: покрај случаите предвидени со Законот за високи раководители, разрешување би можело да следува доколку не биде доставен извештај согласно член 15 став 2 од Законот за катастар на недвижности.

„Директорот на Агенцијата е должен да достави извештај за работата на Агенцијата до Владата на Република Македонија најдоцна до 31 март во тековната година за претходната година.“ Дополнително, предвидено е разрешување и ако директорот по истекот на рокот определен со законот не ги отстрани утврдените недостатоци, ако тие повторно се појават или ако има загуби во финансиското работење.

Во образложението на предлагачот се вели дека целта е да се избегне колизија меѓу законските одредби и да се обезбеди единствен пристап при именувањето, утврдувањето на условите, престанокот на функцијата и разрешувањето на високите раководители. Предлогот е доставен за носење по скратена постапка; законот би стапил во сила осмиот ден по објавувањето во „Службен весник“, а ќе почне да се применува од 1 октомври 2026 година.

Фото: Слободен печат - Драган Митрески