ДУИ обвинува за продор на „српскиот свет“; ВРЕДИ возвраќа за „вечните фотелји“

ДУИ ја обвини коалицијата ВЛЕН дека по влегувањето во Владата овозможила засилен продор на „српскиот свет“ во Република Северна Македонија, истакнувајќи го присуството на Иван Стоилковиќ во составот на Владата, зближувањето со политичките кругови на Милорад Додик и енергетски договори со фирми што се поврзуваат со неговите интереси.

Партијата потсетува дека две години по ред извештајот на Европскиот Парламент забележува загриженост за растот на влијанието на „српскиот свет“ и јасно го нагласува промовирањето на такви политики од страна на претставници на власта. Во реакцијата на ДУИ се споменува и проширувањето на присуството на српски банкарски капитал во државата, што според нив „претставува мозаик кој не може да се негира“.

ДУИ обвинува дека паралелно тече и „систематско разјадување на Охридскиот рамковен договор“ преку одлуките на Уставниот суд и преку владините политики, поради што ја оспорува етничката легитимност на кабинетот. Според ДУИ, ВЛЕН не е само набљудувач туку „камуфлатор, релативизатор и сореализатор“ на политики што ги нарушуваат колективните права на Албанците.

ВРЕДИ возвраќа

Во своето соопштение, ВРЕДИ возврати со остар тон и ДУИ ја нарече со погрдни епитети „недемократската унија за дезинтеграција“. Партијата обвинува дека ДУИ ја држи албанската кауза во заложништво и дека нејзината логика е чисто трансакциска: или тие ќе останат во фотелјите, или ќе го закочат сè.

Во дел од соопштението, ВРЕДИ вели: "ДУИ не ја брани албанската кауза, туку ја држи во заложништво. Логиката им е проста. Или тие ќе седат во фотелјите или ќе закочат сè. Ако се на власт, се им е тамам. Ако не се, одеднаш ништо не чини. Е па, тој филм веќе не поминува. Ама да расчистиме една работа. Албанците не им должат вечна власт на фотелјашите од Мала Речица. Не им должат ни министри, ни директори, ни тендери. А најмалку им дале право, само затоа што останале без фотелји, да го блокираат Законот за правична застапеност и да го уриваат Охридскиот рамковен договор. Цели 25 години ги имаа и ножот и погачата, ама не најдоа време ова право да го заштитат со закон. Поважни им беа тендерите, личното богатење и матните дилови. Сега, кога некој друг ја завршува работата, од очај се фаќаат за сламка и се закануваат дека ќе го закочат целото Собрание. ДУИ не може да им прости на Албанците што ја пратија во опозиција, па сега им се одмаздува со блокирање на Законот за правична застапеност. Албанците не се ничиј партиски плен, а нивните права не се жетони за политичко поткусурување. Охридскиот рамковен договор не е тапија ниту на Али Ахмети, ниту на неговите вечни фотелјаши. Тој им припаѓа на граѓаните и никој нема право да го држи во заложништво поради пуста желба за власт,"

Размената на обвинувања ја отсликува зголемената тензија во рамките на албанскиот политички простор и поттикнува поширока расправа за странските влијанија, правата на малцинствата и одржливоста на постконфликтните аранжмани. И двете страни ја претставуваат својата позиција како заштита на интересите на заедницата, обвинувајќи ја спротивната страна за ставање партиските и личните интереси над правните и уставните гаранции.

Фото: прес-материјал од настанот