Два KC-135 ја напуштија база Безмер по заканите од Иран
Бугарскиот министер за одбрана Димитар Стојанов потврди дека американските танкери ја напуштаат базата Безмер поради реакции од Техеран дека нивното присуство е „учество во агресија и воени злосторства“.
Два американски авиони-цистерни KC-135 ја напуштија воздухопловната база Безмер, потврди бугарскиот министер за одбрана Димитар Стојанов, откако нивното привремено распоредување предизвика остри реакции од страна на Иран.
Според Стојанов, САД ги побарале авионите за привремено стационирање во Бугарија пред еден месец, во рамки на договор за споделено користење воени објекти. Парламентот на Бугарија го одобри нивното распоредување на 22 јули.
Засилена безбедност и грижи кај локалното население
Бугарските власти ја зголемија безбедноста во и околу базата Безмер по појавата на информации дека иранските сили ја разгледуваат можноста за напади врз американски воени цели во југоисточна Европа. Жителите на населените места околу Безмер организираа протести, изразувајќи страв дека базата може да стане цел на ракети и беспилотни летала.
Во извештај што повикува на два извора блиски до иранскиот режим се наведува дека иранските сили ја проценуваат можноста за напади врз американски воени објекти во југоисточна Европа доколку американскиот претседател Доналд Трамп дополнително го ескалира конфликтот. САД се во војна со Иран од 28 февруари.
Портпаролот на иранското Министерство за надворешни работи, Есмаил Багаеи, изјави: "Носителите на одлуки во Бугарија мора да ја сносат одговорноста за опасната одлука за стационирање на американски авиони за полнење гориво во нивните воени бази."
Министерот Стојанов рече дека сите летови на авиони-цистерни за време на нивното привремено распоредување биле тренажни и се изведувале над сојузнички земји, и додаде дека Бугарија "нема информации за директни закани за нејзината национална безбедност".
Фото: прес-материјал од настанот