Dy KC-135 u larguan nga baza Bezmer pas paralajmërimeve të Iranit
Ministri i Mbrojtjes së Bullgarisë, Dimitar Stoyanov, konfirmoi se avionët amerikanë largohen nga Bezmer, pas paralajmërimeve të Teheranit se prezenca e tyre do të përbënte "pjesëmarrje në agresion dhe krime lufte."
Dy avionë furnizues amerikanë KC-135 u larguan nga baza ajrore Bezmer në jug-lindje të Bullgarisë, konfirmoi ministri bullgar i Mbrojtjes, Dimitar Stoyanov, pasi Teherani shprehu reagime të ashpra për vendosjen e tyre të përkohshme.
Sipas Stoyanov, Shtetet e Bashkuara kërkuan vendosjen e avionëve rreth një muaj më parë në kuadër të një marrëveshjeje për përdorim të përbashkët të objekteve ushtarake. Parlamenti bullgar e miratoi vendosjen më 22 korrik.
Rritja e masave të sigurisë dhe shqetësimet lokale
Autoritetet bullgare forcuan sigurinë në Bezmer pas raportimeve se forcat iraniane po shqyrtojnë mundësinë e sulmeve ndaj objektivave ushtarake amerikane në Evropën jug-lindore. Banorët e fshatrave përreth organizuan protesta, duke shprehur frikë se baza mund të kthehet në objektiv për raketa dhe dronë të armatosur.
Një raport, duke cituar dy burime të afërta me regjimin iranian, tha se komandantët iranianë po vlerësojnë opsionet për të goditur vendet ushtarake amerikane në rajon nëse presidenti Donald Trump e eskalon më tej konfliktin. Shtetet e Bashkuara janë në luftë me Iranin që nga 28 shkurt.
Zëdhënësi i Ministrisë së Jashtme të Iranit, Esmail Bagaei, u shpreh: "Vendimmarrësit në Bullgari duhet të mbajnë përgjegjësi për vendimin e rrezikshëm për vendosjen e avionëve amerikanë të furnizimit me karburant në bazat e tyre ushtarake,".
Ministri Stoyanov tha se të gjitha fluturimet e avionëve gjatë qëndrimit të tyre të përkohshëm ishin fluturime stërvitore mbi vende aleate, dhe se Bullgaria "nuk ka informacione për kërcënime direkte ndaj sigurisë së saj kombëtare".
Foto: material shtypi nga ngjarja
