Parlamenti Evropian miraton rimbursime të plota për fluturimet e anuluara — Këshilli i BE-së në vendim

Parlamenti Evropian miratoi një rregullore të re që zgjeron të drejtat e udhëtarëve për të gjithë llojet e transportit dhe parashikon rimbursim të plotë për biletat e avionit të blera përmes agjencive turistike ose platformave online në rast anulimi të fluturimit.

Rregullorja u miratua me 652 vota "për", dy "kundër" dhe tetë "abstenime". Ajo tani pret miratimin formal nga Këshilli i BE-së dhe pritet të hyjë në fuqi më 23 tetor 2027.

Si do të funksionojnë rimbursimet dhe afatet

Sipas rregullave të reja, linja ajrore duhet t'i transferojë shumën te ndërmjetësi brenda maksimumi shtatë ditësh. Agjencitë ose platformat e rezervimit kanë pastaj shtatë ditë shtesë për t'i kthyer paratë te pasagjeri. Ndërmjetësit do të duhet të njoftojnë përdoruesit për procedurën e rimbursimit në momentin e rezervimit.

Rregullorja parashikon gjithashtu formularë të standardizuar për kërkesat për rimbursim dhe kompensim, të disponueshme në të gjitha gjuhët zyrtare të Bashkimit Evropian. Paketa mbulon transportin ajror, hekurudhor, rrugor dhe detar.

Personat me aftësi të kufizuara ose me mobilitet të reduktuar do të kenë të drejtë të shoqërohen pa pagesë nga një person, kur prezenca e tij është e nevojshme. Autoritetet kombëtare do të marrin kompetenca të zgjeruara për auditime, inspektime dhe intervista me operatorët sipas iniciativës së tyre.

Përveç rimbursimeve, nga 23 tetori 2027 do të hyjnë në fuqi edhe ndryshime lidhur me bagazhin e dorës në fluturime: pasagjerët do të kenë të drejtë për bagazh dore deri në 7 kg plus një send personal, dhe kompanitë ajrore do të detyrohen të shfaqin çmimin e biletës që përfshin bagazhin e dorës në momentin e rezervimit.

Foto: material shtypi nga ngjarja