BE dhuron 26 automjete të specializuara dhe 4 milionë euro pajisje për Administratën Doganore

Bashkimi Evropian dhuroi 26 automjete të specializuara dhe pajisje forenzike dhe IT me vlerë 4 milionë euro për Administratën Doganore, paketë e prezantuar sot në terminalin kufitar Tabanovc për të forcuar kapacitetet në luftën kundër kriminalitetit të organizuar.

Dhurimi përfshin 26 automjete të specializuara të financuara nga BE, si dhe pajisje të përmirësuara forenzike dhe harduer IT të destinuara për operacionet doganore.

Drejtori i Doganës, Boban Nikolovski, njoftoi se modernizimi do të rrisë kontrollet në pikat kufitare, si dhe do të thjeshtojë procedurat dhe do të sjellë përfitime të mëdha për tregtinë legjitime.

Përkrahja e BE-së pjesë e një programi më të gjerë investimesh

Projektet të financuara nga BE dhe të zbatuara për Administratën Doganore arrijnë në total 25 milionë euro. Lista e projekteve — që përfshin edhe terminalin doganor në Tabanovc — është pjesë e kërkesave për përafrim me Bashkimin Doganor të BE si një zonë e vetme tregtare.

Sipas zyrtarëve, 21 automjete do t'u jepen njësisë mobile të doganës, ndërsa pesë do t'i shërbejnë njësisë speciale K-9. Pajisjet IT janë të lidhura me dhomën e përmirësuar të serverëve në selinë qendrore të doganës, ndërsa softueri vendos një sistem të ri të bashkuar për menaxhimin e operatorëve ekonomikë në të gjithë vendin.

Ambasadori i BE-së, Rokas, tha se qëllimi i mbështetjes është të forcohen kapacitetet e doganës për të luftuar kriminalitetin e organizuar që ndikon në tregtinë dhe zinxhirët e furnizimit.

Foto: material shtypi nga ngjarja