Филипче: 3.000 првачиња и 433 паралелки помалку — ова е билансот на политиките на Мицкоски
Претседателот на СДСМ ја обвини владата дека нејзините лоши политики довеле до масовно иселување и драматичен пад на бројот на запишани ученици.
Денеска почнува новата школска година, а според претседателот на СДСМ, Венко Филипче, потажен почеток на школската година досега оваа држава немала. На денешната прес-конференција, Филипче изнесе тврдења дека во прво одделение се запишани значително помал број деца во споредба со минатата година.
Драматичен пад на бројот на ученици
„3.000 помалку деца запишани во прво одделение, 433 паралелки помалку, 26 затворени училишта“, изјави Филипче, нагласувајќи дека нема поголем и подобар показател за лошите политики на владата предводена од Христијан Мицкоски од оваа бројка. Тој посочи дека лани во прво одделение се запишале 17.900 деца, додека оваа година бројката изнесува 14.900 деца.
Иселување поради лоши политики
Според лидерот на опозицијата, овој пад не е резултат само на демографските движења, туку на масовно иселување. „Што се случило со тие луѓе? Сигурно не е тоа резултат само на демографските движења, тие луѓе едноставно се иселиле“, рече тој. Филипче обвини дека граѓаните ја напуштаат земјата поради тоа што не ја гледаат иднината во неа, посочувајќи на недостаток на мерки, напредок и добри економски политики, како и отсуство на поддршка за младите брачни парови.
Фото: СДСМ / видеозапис од прес-конференцијата
