Филипче: ММФ ги разби бајките на Мицкоски — Македонија на дното во Европа

Лидерот на СДСМ, Венко Филипче, изјави дека проекциите на Меѓународниот монетарен фонд (ММФ) ја кажуваат вистинската слика за економијата на Македонија и ги разобличуваат тврдењата на Христијан Мицкоски за „третата економија“ во Европа.

Според Филипче, ММФ ја рангира земјата на 41. место од вкупно 48 европски економии по проектиран БДП по жител, и ја наведе сумата што ММФ ја дава за вкупниот приход по глава на жител.

Порачува дека граѓаните го чувствуваат падот на животниот стандард

„Проекциите на ММФ велат БДП по жител во Македонија ќе изнесува 11 762 долари. Од земјите во регионот, пред нас се Србија, Црна Гора, Албанија. Разликата со најбогатите европски економии, пак, останува огромна. Ова е сè она што СДСМ го зборува последната година. Сега потврдено и од ММФ“, изјави Филипче.

Тој додаде дека реалноста е видлива за граѓаните преку растот на цените, стагнацијата на платите и тешкотиите да се покријат месечните трошоци според синдикалната кошничка.

„Реалноста е дека имаме четири милијарди евра ново задолжување за две години. Реалноста е дека луѓето живеат полошо. Реалноста е очекуваното поскапување на струјата и парното. Реалноста е дека нема зголемување на минималната плата. Наместо тоа, слушаме само бајки од Христијан Мицкоски, кој се бори единствено за своите криминални тендери и за сопствениот профит, како шеф на организирана криминална група која во изминатите две години целосно ја осиромашува земјата. За сето ова ќе има одговорност. Бандата ќе одговара“, изјави лидерот на СДСМ.

Фото: СДСМ