Филипче: Во кризата СДСМ насочи 2 милијарди евра кон граѓаните — сега кој доби помош? Никој

Претседателот на СДСМ, д-р Венко Филипче, на денешната прес‑конференција порача дека на граѓаните им се потребни конкретни мерки за да можат да ги преживеат растот на цените и животните трошоци, а власта предводена од ВМРО‑ДПМНЕ не нуди соодветна помош.

Филипче потсети на мерките што, како што рече, ги насочиле владите на СДСМ во претходната криза и нагласи дека тогаш биле издвоени 2 милијарди евра за поддршка на граѓаните, додека сега, поради поскапувањата — особено на горивата — никој не добил соодветен пакет мерки.

Нагласување на бројките и критика кон „кошничката“

„Гледам дека често целокупниот наратив е да се споредува тоа што сега се случува со 2022 година. Се споредува кризата, платите, менаџирањето и така натаму. Граѓаните не ја бираа оваа власт да споредува како било порано, очекуваат мерки. Во таа криза, да потсетам, 2 милијарди евра вкупен буџет беше насочен кон граѓаните, преку посебни мерки за различни категории граѓани, за социјални случаи, семејства со повеќе деца, студенти, стари луѓе, 600.000 семејства тогаш имаа субвенционирана струја итн. Кој сега доби некој пакет во оваа криза со поскапувањето на горивата во изминатиот период? Никој“, рече Филипче.

Тој оцени дека, додека растат цените и основните трошоци за живот, граѓаните остануваат сами да се справуваат затоа што власта не нуди конкретни решенија, туку најави за „кошнички“ кои според него се сведуваат на ПР‑трикови.

„Неколку пати го одбиваат нашиот предлог да се зголеми минималната плата на 600 евра. Кошничката достигна 70.000 денари. Ако се додадат другите трошоци реални, кирија за стан или кредит за стан, трошоците надминуваат 90 илјади денари. Луѓето не можат да преживеат. И од ова што го спомнува некаква кошничка, јас не очекувам ништо, заради тоа што сметам дека е повторно само некој ПР трик, нешто као ќе најават и на крај нема да биде ништо“, рече Филипче.

Фото: прес-материјал од настанот