Фондот за здравствено осигурување предлага намалување на боледувањето од матични лекари на пет дена

Директорот на Фондот за здравствено осигурување, Златко Перински, на 14 септември 2026 година соопшти дека Фондот ќе предложи строжи контроли и измени во Правилникот за боледување пред Управниот одбор, со цел да се обезбеди дека средствата стигнуваат до оние на кои им се најпотребни и да се спречи потенцијална злоупотреба.

Намалување на рокот за боледување од матичен и заеднички контроли

Една од клучните предвидени измени е намалување на бројот на дена кои може да ги издаде матичниот лекар без дополнителна проверка — од сегашни седум на пет дена. Перински рече дека таквиот краток рок ќе биде доволен за прибирање на дополнителна анамнеза или за продолжување на боледувањето доколку е потребно.

„Не сакаме да направиме систем којшто е построг, туку сакаме да направиме систем којшто е правичен“ - рече Перински.

Според кажаното, само во август Фондот исплатил над 623 милиони денари за боледувања, од кои 414 милиони денари биле издвоени за породилни отсуства, а остатокот за други боледувања. Перински нагласи дека за него и вработените во Фондот тоа не се само ставки во буџетот туку обврски кон оние кои имаат потреба, порачувајќи дека при такви износи мора да има јасни правила и механизми за контрола.

Контролите ќе се извршуваат по пријава од работодавачите, но и по случаен избор. Доколку контролорот не го најде осигуреникот дома, ќе му се остави документ со упатување да се јави пред лекарска комисија и да даде образложение, а за тоа ќе биде известен и работодавачот.

Перински информираше дека во последниот период при проверите биле утврдени неправилности кај околу 30 проценти од истражуваниот примерок со земени боледувања во Министерството за внатрешни работи, при што се изречени парични казни, а анализата за боледувањата во Министерството за одбрана е при крај. Тој посочи дека злоупотребите сè почесто се евидентираат и во приватниот сектор.

„Повторно ќе кажам, темата боледување и породилни отсуства секогаш е сензитивна во јавноста и нам не ни е идејата да ги спречиме правата на боледување, туку да спречиме злоупотреба во рамки на искористување на боледувањето, заради тоа што Фондот за здравствено осигурување за 2026 година во рамки на својот буџет има предвидено 6 милијарди и 454 милиони денари средства што се наменети за боледувања и породилни отсуства. Тоа е значителна сума и во таа насока мораме да го затегнеме системот на контрола“ - порача Перински.

Тој додаде дека во делот на биолошки потпомогнатото оплодување мерката за овозможување до шест ин витро обиди веќе дава резултати: од над 1.880 обиди, 237 се однесуваат на четврти, петти или шести обид. „Во моментот анализираме градација на финансискиот пакет којшто го даваме за еден обид. Медицински тимови работат на утврдување на поиндивидуализиран пристап во делот на издавање на ваучерот за биолошки потпомогнато оплодување во делот на првиот, вториот или третиот обид, сè со цел да го зголемиме процентот на можност во првите обиди да имаме позитивен исход од целата процедура. Ова се планови коишто планираме да ги ефектуираме од 2027 година, но за да бидеме сигурни дека ќе имаме и финансиска конструкција, а секако и медицински да имаме поддршка за ова, сепак, ќе ни треба уште некој период да го доработиме“ - истакна Перински.

Како дополнителна олеснувачка мерка за пациентите, Фондот ќе предложи и промена на важењето на рецептите издадени од дежурните служби: наместо досегашното правило рецептите да се реализираат истиот ден до полноќ, ќе се бара рокот да се продолжи на 24 часа.

Фото: прес-материјал од настанот