Ги изигра мртвите — купи ковчег, глумеше мртвец и побегна на погребот

Маж во кинеската провинција Хунан ја лажирал сопствената смрт со цел да избегне затворска казна, при што, според полицијата, добил помош од членови на семејството за да организира лажен погреб и да избега додека ковчегот се спушта во гробот.

Случајот почнал кога тој бил запрен во сообраќајна контрола и приведен поради возење во алкохолизирана состојба. Проверките покажале дека тоа не му е прв прекршок — двапати претходно бил фатен како вози пијан и без возачка дозвола, и третата пријава би му донела сигурна затворска казна.

Откако бил пуштен со кауција и додека ја чекал завршницата од постапката, тој, како што утврдиле истражителите, го подготвил планот за исчезнување. Купил ковчег и ја инсценирал наводната смрт: низ куќата разфрлал празни шишиња од лекови, вежбал да го задржува здивот и користел уреди за ладење за телото да делува ладно на допир.

Сомнителни околности и снимки ја разобличиле измамата

Соседите подоцна сведочеле дека го виделе телото, но дека „лицето му било покриено со ткаенина“. Погребот бил одржан истиот ден, но додека ковчегот се спуштал во гробот, мажот веќе бил на пат кон провинцијата Јунан.

Полицијата забележала неколку несогласувања: ковчегот бил купен пред наводната смрт, не биле повикани итни служби и не постоела официјална умреница. Контролите на надзорните камери и банкарските трансакции покажале дека мажот бил жив, по што била распишана потрага.

На крајот тој бил уапсен, судот го осудил на пет месеци затвор и му беше изречена парична казна од околу 3.000 долари. Против неговата мајка и баба е покрената посебна кривична постапка поради сомнение дека му помогнале во лажирањето на смртта и во криењето од полицијата.

Фото: прес-материјал од настанот