„Гис ден киц“ мапира над 900.000 дрвја во Берлин и покажува кои итно имаат потреба од вода

Интерактивната платформа „Гис ден киц“ мапира над 900.000 дрвја низ Берлин и пресметува колку вода му е потребна на секое дрво, овозможувајќи им на граѓаните организирано да се вклучат во нивното наводнување. Системот е изграден на софтвер со отворен код, па истиот модел може да го преземе и применува секој друг град што се соочува со топлотни бранови.

Платформата ја разви „Ситилаб Берлин“ и ги пресметува потребите за вода врз основа на возраста на дрвото, видот и локалните врнежи. На интерактивната мапа преку бои се означуваат дрвјата на кои им е критично потребно наводнување, а корисниците можат да видат кога дрвото последен пат добило вода и да го евидентираат своето полевање.

Младите садници немаат развиен коренов систем како постарите стебла и затоа бараат почесто наводнување за да преживеат. Платформата нуди и совети за правилна техника на полевање, собирање дождовница, како и локации на градските пумпи за вода.

Волонтерска мрежа и потпора од општинските служби

Иницијативата започна во 2020 година и во моментов брои 12.000 регистрирани волонтери. Нивниот ангажман ги надополнува активностите на општинските служби за зеленило, кои не можат секогаш сами да одговорат на потребите за време на сè пожешките лета.

Најголемиот годишен врв во наводнувањето, со речиси половина милион истурени литри вода, беше забележан по лансирањето на платформата во 2020 година за време на пандемијата, кога граѓаните бараа начин да излезат надвор и да се поврзат со природата и заедницата. Полевањето се интензивира за време на топлотните бранови: така, на 27 јуни, кога во Берлин беше измерен историски температурен рекорд од 39,9 степени, граѓаните истурија 8.000 литри вода врз дрвјата низ градот.

Фото: СитиЛаб)