Zjarri në bazën ushtarake Wainwright në Alberta — ka të vdekur dhe të lënduar

Një zjarri i madh shpërtheu dje rreth orës 16:00 me kohën lokale në bazën ushtarake Wainwright në provincën Alberta, një nga bazat më të frekuentuara në Kanada, duke shkaktuar të vdekur dhe të lënduar, ndërsa flakët u përhapën në zonat rurale përreth për shkak të erërave të forta.

Forcat e Armatosura Kanadeze thanë se po vlerësojnë përmasat e incidentit dhe se detajet për viktimat nuk do të publikohen derisa të mbarojë hetimi zyrtar. Një hetim do të nisë për të përcaktuar shkaqet e ngjarjes.

Disa media lokale raportuan, në mënyrë jozyrtare, se të paktën shtatë persona u vranë dhe disa dhjetëra u plagosën pasi një tubacion i gazit u godit gjatë një stërvitjeje me armë të zjarrit. Autoritetet nuk kanë konfirmuar zyrtarisht këto shifra.

"Nuk mund të kujtoj një incident të tillë kohët e fundit," tha ministri i Mbrojtjes Dejvid Mekginti, duke njoftuar se forcat e armatosura, qeveria federale dhe autoritetet provinciale e lokale po bashkëpunojnë për të zbuluar rrethanat e ngjarjes.

Shërbimet e urgjencës dhe spitalet

Për shkak të numrit të madh të të lënduarve, spitalet në Edmonton aktivizuan kodin portokalli, duke zbatuar protokolle të veçanta për raste me shumë viktima. Ekipet e emergjencës dhe reagimi ushtarak po punojnë për trajtimin e të lënduarve dhe sigurinë e zonës.

Kryeministri Mark Karni tha se zjarrit i kishte paraprirë “një incident serioz”, por nuk dha detaje të mëtejshme ndërsa vazhdon hetimi. Publiku u udhëzua të shmangë zonat e prekura derisa të përfundojnë operacionet e emergjencës.

Foto: material shtypi nga ngjarja