ГОЛЕМО МНОЗИНСТВО ЕВРОПЕЈЦИ САКААТ ЕУ ДА ИМА СВОЈА АРМИЈА
ГЛОБСЕК: силна поддршка за европски воени капацитети, но и намалена доверба во САД во дел од земјите.

Околу 71 отсто од Европејците сакаат Европската Унија да формира своја армија, покажува новата анкета која истовремено открива растечка недоверба во Вашингтон и длабоки поделби околу руската војна во Украина.
Во извештајот „Трендови 2026“ од безбедносниот тинк‑тенк ГЛОБСЕК е констатирано дека поддршката е широка во сите анкетирани држави. Највисока е во Романија со 82 отсто, потоа следуваат Литванија со 78 отсто и Франција со 75 отсто.
Дури и во земји што традиционално се претпазливи кон поголема европска одбранбена интеграција мнозинството ја поддржа идејата: околу 70 отсто во Полска и во Бугарија, а 69 отсто во Германија.
НАТО, задолжителна служба и перцепциите кон САД
ГЛОБСЕК спровел испитување меѓу испитаници во 14 трансатлантски земји, вклучувајќи 11 земји членки на ЕУ, Украина, Обединетото Кралство и САД.
Поддршката за европски воени капацитети не значи автоматско одбивање на НАТО: околу 77 отсто од испитаниците во анкетирани земји членки на НАТО рекле дека би гласале за останување во Алијансата, а 78 отсто од испитаниците во земјите на ЕУ го поддржуваат развојот на сопствени одбранбени капацитети на блокот паралелно со Алијансата.
Има силна поддршка и за повторно воведување на задолжителната воена служба: меѓу испитаниците во држави без обврска за служба, 64 отсто се за враќање на мобилизацијата. Највисоки бројки за оваа мера се во Чешка, Франција, Германија и Словачка.
Анкетата укажува и на растечки трансатлантски јаз во ставовите кон САД: повеќе од една третина од испитаниците во анкетирани европски земји сега ги сметаат САД за безбедносна закана. Околу половина од испитаниците во Германија, Франција и Обединетото Кралство го делат ова мислење, во споредба со приближно една третина во Централна и Источна Европа. Германија е единствената земја каде мнозинството ги смета САД за безбедносна закана.
Резултатите ги истакнуваат политичкиот парадокс: гласачите поддржуваат посилна европска војска, но остануваат посветени на НАТО иако довербата во неговиот најмоќен член опаѓа.
Фото: ДПА)


