Гордана Димитриеска-Кочоска: Инвестициите и фискалната консолидација треба да се ускладат

Министерката за финансии Гордана Димитриеска-Кочоска нагласи дека треба да се зачува инвестицискиот циклус кој дава поддршка на економскиот раст, додека Министерството истовремено спроведува постепена фискална консолидација. Изјавата ја даде на панел-дискусијата „Од притисокот во еврозоната до фискална отпорност: Буџетски приоритети, реалности во приватниот сектор и регионални лекции“ во рамките на регионалната конференција Охрид 2026.

„Инвестицискиот циклус што го имаме во изминатиот период треба да го зачуваме. Во 10 последователни квартали во континуитет имаме стапка на раст од 3 и над три проценти, а во последниот квартал стапка на раст од 4,3 отсто. Тоа покажува дека се движиме по една добра траекторија,“ истакна Димитриеска-Кочоска, повикувајќи се на статистичките податоци за растот.

Поддршка на инвестициите и постепена консолидација

Според министерката, поддршката на инвестицискиот циклус треба да оди рака под рака со преземање на постапка за постепена фискална консолидација која е приоритет за Министерството за финансии. Таа посочи дека во практичната политика тоа значело одредено прилагодување на буџетните цели за да се овозможи финансирање проекти со долгорочна вредност за економијата.

„- Прашањето е дали треба да се стремите кон тоа да имате буџетски дефицит колку што сте предвиделе. Дали е можеби потребно и мало изместување во однос на тоа што сте го проектирале во насока на тоа да дадете поддршка на оној инвестициски циклус што трае во еден подолг временски период. И тоа беше еден од најголемите предизвици што го имавме како Министерство за финансии при подготовка на последниот ребаланс на буџетот. Нашата одлука секако беше дека ќе балансираме. Од една страна, дефинитивно, ќе поместиме дел од буџетскиот дефицит во нагорна линија притоа имајќи предвид дека најголем дел од тој дефицит ќе оди кон финансирање проекти, кои ќе додадат дополнителна вредност за економијата, но во исто време внимателно ќе работиме и на приходната страна, затоа што не е фискалната консолидација само фокус на расходната,“ рече Димитриеска-Кочоска.

Таа потсети дека земјата имаше голем буџетски дефицит во 2020 година и дека во 2021 година консолидирањето не се одвивало доволно брзо, што го забавило процесот на фискална прилагодба. Дополнителен притисок, според неа, создаваат и исплатите поврзани со стекнати законски права кои порано не биле вклучени во буџетот.

Во заклучок министерката истакна дека приоритетот кон фискалната консолидација е важен поради влијанието врз кредитниот рејтинг и идните каматни стапки, но дека тоа не смее да се постигнува „по секоја цена“ ако тоа би довело до нарушување на инвестициите. „- Приоритет мора да има фискалната консолидација затоа што тоа на крајот ќе има влијание и врз кредитниот рејтинг, ќе има влијание во иднина и на каматните стапки. Што значи тоа треба да биде приоритет, но не по секоја цена за колкав временски период ќе го оствариме. Не треба да брзаме во остварување на фискалната консолидација - буџетски дефицит под 3 % и јавен долг под 60 %, а на штета на тоа да направиме нарушување кај инвестициите,“ рече Димитриеска-Кочоска.

Фото: прес-материјал од настанот