Гори депонија кај „Стенковец“, густ црн чад над Скопје

Густ црн чад се издига над делови од Скопје откако попладнево избувна пожар кај спортскиот аеродром „Стенковец“. Гореше дива депонија со наталожен отпад, што создава голема, тлеачка површина и испушта густ, непријатен мирис.

Пожарите во регионот ја отежнуваат интервенцијата

Директорот на Дирекцијата за заштита и спасување (ДЗС), Стојанче Ангелов, кажа дека скопските пожарникари веќе се на терен и дејствуваат кај „Стенковец“.

„Се крева црн чад како атомска бомба. Скопските пожарникари стигнаа на лице место. Поголема површина е зафатена и гори сува трева, ќе биде тешко да се совлада. Активен е подолго време, гори наталожен отпад, кој ќе има уште повеќе чад, повеќе густ чад, и во наредниот период скопјани ќе почувствуваат уште посилен мирис на чад“, изјави Ангелов.

Пожарот кај „Стенковец“ дополнително ја влошува состојбата со пожарите во Скопскиот регион, каде истовремено се активни повеќе жаришта. Ветерот го носи чадот и од големиот пожар во месноста Рамно, на Скопска Црна Гора, кој гори веќе два дена.

Ангелов претходно соопшти и детали за интервенцијата во Рамно, во Општина Чучер-Сандево: „Ова зад мене е големиот чад од пожарот во месноста Рамно, на Скопска Црна Гора, во Општина Чучер-Сандево. Два дена се обидуваме да го ставиме под контрола, но силниот ветер дополнително ја влошува состојбата. Ветерот дува во насока кон Скопје и чадот се шири кон градот. Дел од Скопје веќе го чувствува мирисот на чад. Во текот на денот дејствуваме и со полициски хеликоптер. Таму се скопските пожарникари, со поддршка од пинцгауери на ДЗС, а на лице место се и 30 припадници на Армијата. Нивната задача е да спречат пожарот да помине преку патот. Во моментов нема опасност за околните села. Пожарот е во еден многу длабок дол, долг околу 1.600 метри, и ќе биде проблем да се стави под контрола. Во долот има многу чад, што не дозволува да се дејствува. Очекувам мирисот на чад да се чувствува сè додека ветерот дува во оваа насока. Од УХМР попладнево се очекува северозападен ветер, па мирисот би требало да се чувствува уште неколку часа, до вечерните часови“, рече Ангелов.

Службите велат дека наталожениот отпад во „Стенковец“ и конфликтната ситуација во Рамно го отежнуваат справувањето со огнот. Екипите продолжуваат со дејствија од земја и воздух, а на терен има и армиски сили, додека граѓаните се предупредени да очекуваат чадни услови додека ветерот носи чад кон градот.

Фото: ДЗС)