Груби ќе ги повика сите министри од седницата на 6.06.2023 за сведоци

Артан Груби изјави дека за сведоци во суд ги предложил сите министри кои биле присутни на владината седница одржана на 6.06.2023 година, седница што тој ја претседавал и на која била донесена одлуката за набавка на спорните видеолотариски (ВЛ) терминали за Државна лотарија во вредност од 9,7 милиони евра.

Груби појасни дека тогашниот премиер Димитар Ковачевски и министрите Славјанка Петровска, Оливер Спасовски и Љупчо Николовски на таа седница не биле присутни и биле заменувани од нивните заменици.

Сведоци предложени од Груби

Како сведоци во негов прилог тој ги предложил тогашните: вицепремиер за европски прашања Бојан Мариќиќ (СДСМ), вицепремиер за економски прашања Фатмир Битиќи (СДСМ), вицепремиер за добра владејачка политика Славица Грковска (СДСМ); ресорните министри: за надворешни работи Бујар Османи (ДУИ), за финансии Фатмир Бесими (ДУИ), за правда Кренар Лога (Алијанса за Албанците), за здравство Фатмир Беким Сали, за информатичко општество и администрација Азир Алиу (Алијанса за Албанците), за животна средина и просторно планирање Каја Шукова (СДСМ), за труд и социјална политика Јована Тренчевска (СДСМ), за транспорт и врски Благој Бочварски (СДСМ), за култура Бисера Костадиновска‑Стојчевска (СДСМ), за образование и наука Јетон Шаќири (ДУИ), за економија Крешник Бектеши (ДУИ), за локална самоуправа Ристо Пенов (ЛДП), како и замениците‑министри за внатрешни работи, за одбрана и за земјоделство, шумарство и водостопанство.

Денешното рочиште за предметот „Државна лотарија“ повторно беше одложено — по три претходни одложувања поради обуки на двајцата обвинители — затоа што сведокот Н. Хоџа оправдано бил отсутен и не можел да дојде да сведочи.

Иако се работи за обвинителен предлог и се очекуваше постапката да се движи брзо, судењето сè уште не напредува.

На сите обвинети во предметот им се става на товар кривичното дело Злоупотреба на службена положба и овластување од член 353 став 5, во врска со став 4 и став 1, како и член 22 од Кривичниот законик, пријавено за дејствија извршени во 2023 и 2024 година. Пропишаната казна за овие кривични дела е од една до пет години затвор.

Обвинителството тврди дека обвинетите незаконски овозможиле набавка на машини и видеолотариски терминали и самостојно приредување електронски игри на среќа во вредност од 9,7 милиони евра, иако законското право веќе било доделено на компанијата Казинос Австрија. Според обвинителниот предлог, при основањето на Друштвото за приредување игри на среќа Државна видеолотарија на Република Македонија — КАЗИНОС АУСТРИЈА ДОО Скопје, во 2013 година тоа право било вложено како непаричен влог во вредност од 6.244.898 евра и со тоа компанијата стекнала удел од 51% од основниот капитал.

Во обвинителниот предлог се наведува и дека на 09.05.2023 година првообвинетиот Бајрами, генерален директор и претседател на Управниот одбор на Државна лотарија, до третиот обвинет Методија Димовски, генерален секретар на Владата, доставил Информација за потребата од преземање активности за самостојно приредување на електронските игри на среќа. Димовски на 06.06.2023 година ја предложил таа Информација како дополнување на точка од дневниот ред, постапувајќи спротивно на член 119 став 2 од Деловникот за работа на Владата и не ја вратил информацијата до подносителот ниту ја препратил до надлежниот орган.

Обвинението посочува дека Груби, кој имал реално влијание во раководењето со АД Државна лотарија, во својство на одговорно лице претседавал со владина седница и предложил дополнетата точка да се усвои иако бил свесен дека одлуката не е во надлежност на Владата како Собрание на Акционерското друштво. Надзорниот одбор потоа ја одобрил постапката за јавна набавка на видеолотариски терминали и со тоа биле преземени обврски за исплата, поради што, според Обвинителството, на компанијата ѝ е нанесена штета во наведената сума.

Адвокатите и обвинетите постојано тврдат дека од оваа јавна набавка немало штета и затоа Обвинителството не бара надомест во предметот. Тие велат дека сумата од 9,7 милиони евра не е проневера, ниту пари украдени, туку вредност на апаратите кои сè уште се имот на Државна лотарија и чија вредност, според нив, само расте. Додаваат и дека Лотаријата имала забрана само за организирање игри на среќа на интернет, а не за игри со купените апарати.

Фото: СДК.МК)