Helikopter i EUFOR, CH-47 Chinook, u rrëzua pranë Brçkos — katër të vdekur, 11 të lënduar

Një helikopter transportues CH-47 "Chinook", i operuar nga forcat italiane në kuadër të misionit EUFOR, u rrëzua pasdite pranë fshatit Gorice, afër Brçkos në Bosnjë e Hercegovinë. Sipas raportimeve në mediat serbe, në aksident kanë vdekur katër persona, ndërsa 11 janë plagosur.

EUFOR konfirmoi se një nga aeroplanët e saj u rrëzua gjatë një operacioni rutinë dhe tha se nuk ka shkaktuar dëme në infrastrukturën civile, pasuri apo automjete.

Policia, zjarrfikësit dhe njësitë e shërbimit të ndihmës së shpejtë mbërritën menjëherë në vendngjarje. Të lënduarit u dërguan në Qendrën e Shëndetit në Brçko, ku stafi mjekësor u vendos në gatishmëri; kryetari i Brçkos, Sinisa Milic, tha se rastet më të rënda do të transferohen në spitale të tjera për trajtim të mëtejshëm.

Hetim i hapur

EUFOR nisi një hetim të detajuar për shkaqet e rrëzimit dhe njoftoi se informacione të mëtejshme do të publikohen pasi të sqarohen faktet. Misioni apeloi që qytetarët të mos shpërndajnë informacione të paprovuara dhe të ndjekin burimet zyrtare.

Një postim në rrjetet sociale që përmban video nga momenti i aksidentit shkruante: "Video tregon momentin kur një CH-47 Chinook italian u rrëzua në BiH. Ky është incidenti më serioz i lidhur me misionin EUFOR Althea në Bosnjë dhe Hercegovinë që nga viti 2008 kur një helikopter maqedonas u rrëzua, duke rezultuar me vdekjen e të gjithë 11 pasagjerëve dhe ekuipazhit." Postimi ishte nga llogaria GOLDZEN.

Foto: Printskrin