И МНР се оградува од испраќањето на осудениот разузнавач во Виена

Министерството за надворешни работи и претседателката Гордана Сиљановска–Давкова се оградуваат од испраќањето на осудениот разузнавач Киро Тодоровски во Виена како претставник на Агенцијата за разузнавање во дипломатско‑конзуларното претставништво, и посочуваат дека кандидатот го избрала директорката на Агенцијата, Габриела Јаковлева.

Од Министерството за надворешни работи и надворешна трговија наведуваат дека постапката за упатување службеници од други државни органи во дипломатско‑конзуларните претставништва е уредена со Законот за надворешни работи и дека изборот се спроведува од надлежниот орган, а не од Министерството.

„Постапката за упатување службеници од други државни органи и органи на државната управа е уредена со Законот за надворешни работи. Согласно со Законот, за упатување службеници од друг државен орган, интерниот конкурс го објавува органот од кој доаѓа службеникот, а постапката за избор ја спроведува петчлена комисија формирана од функционерот кој раководи со тој орган. Оттука, Законот јасно утврдува дека изборот на кандидатот не го врши Министерството за надворешни работи и надворешна трговија, туку надлежниот орган во кој лицето е вработено,“ велат од Министерството за надворешни работи.

Претседателката ја пренесува одговорноста на агенцијата

Во својот соло одговор, претседателката Гордана Сиљановска–Давкова подвлече дека Агенцијата за разузнавање е посебен орган на државната управа, дека одлуката за избор ја потпишува директорката на Агенцијата, Габриела Јаковлева, додека министерот за надворешни работи носи решение за упатување.

Поставени се и прашања како Тодоровски — и покрај правосилната пресуда во случајот „Титаник“ и податокот дека е осудуван — ја поминал безбедносната проверка на Агенцијата за национална безбедност и како Дирекцијата за безбедност на класифицирани информации му издала безбедносен сертификат за пристап до класифицирани информации. Дирекцијата, слично како и АНБ, одговори дека евиденцијата што ја води за обработените барања и издадените сертификати е со ознака „за ограничена употреба“ и до неа не е дозволен слободен пристап.

Засега нема официјално објаснување ниту одговорност за тоа како Тодоровски добил сертификат за пристап до класифицирани информации и бил испратен во странство и покрај неговата правосилна осудителна пресуда.

Фото: Макфакс