Власта и опозицијата разменуваат обвинувања за случајот со Алта банка

Во денешното известување Народната банка нема податоци за евентуален купувач на „АЛТА банка“ ниту потврда од Србија за продажба на акциите; од информацијата што треба да пристигне од Белград зависи каде и како би се продавале акциите. НБРМ соопшти и дека утре во трговскиот центар „Бисер“ во Скопје ќе биде отворена нова експозитура на „Алта банка“, каде граѓаните без платежни картички ќе можат да подигнуваат пари на шалтер.

Изјава на Народната банка и привремена администрација

Во новото известување од Народната банка се потенцира дека централната банка внимателно ја следи состојбата во „АЛТА банка“ АД Битола и презема активности за постепено проширување на достапноста на банкарските услуги со приоритет да им се овозможи на сите клиенти полесен пристап до сопствените средства и непречено извршување на платежните услуги.

„Народната банка продолжува внимателно да ја следи состојбата во „АЛТА банка" АД Битола и да презема активности за постепено проширување на достапноста на банкарските услуги, со приоритет да им се овозможи на сите клиенти полесен пристап до сопствените средства и непречено извршување на платежните услуги. „АЛТА банка" АД Битола продолжува да работи, а привремената администрација е заштитна мерка којашто се применува до разрешување на сопственичката состојба“, соопштија од Народната банка .

Опозицијата го искористи новото соопштение за да упати критики кон премиерот. Претседателот на СДСМ, Венко Филипче, праша во кое својство Христијан Мицкоски бара купувачи за Алта банка.

„Го слушам изминатите денови премиерот Христијан Мицкоски како кажува дека нашол купувачи за Алта банка. Тој нашол купувачи за Алта банка. Во кое својство? Што е премиерот Мицкоски? Дилер, посредник, пронаоѓач на потенцијални купувачи на банки кај нас. Дали тој, исто како што сега наоѓа купувачи за Алта банка Скопје, бил човекот што ја донел Алта банка Србија кај нас“, изјави лидерот на СДСМ, Венко Филипче .

Владината партија возврати со контраобвинувања и го спомена и случајот со Еуростандард банка, обвинувајќи за наводни сомнителни трансакции од минатото.

„Филипче и Заев мора јавно и недвосмислено да одговорат дали знаеле за внесот на 110 милиони евра од Венецуела во Македонија и дали некој од тогашната власт имал улога во трансакциите. Во 2019 година, кога Заев беше премиер, а Филипче министер, преку Еуростандард банка биле реализирани трансакции во вредност од 110 милиони евра, сомнителни пари од Венецуела која тогаш беше под санкции“, рече Бране Петрушевски од ВМРО ДПМНЕ .

Пред околу 10 дена во Србија беше уапсен сопственикот на „Алта банка“, Давор Мацура, кој се наоѓа во притвор. Во Македонија Народната банка воведе административна управа и ограничувања за повлекување пари, мерки што предизвикаа револт и долги редици пред експозитурите отворени за пензионерите без платежни картички и за одредени корисници на социјална помош.

Утре во Собранието ќе се одржи надзорна расправа за случајот со „Алта банка“.

Фото: прес-материјал од настанот