Инцидент кај Банско: товарно „Форд транзит“ удри полициски службеник и трактор, двајца тешко повредени

Двајца се здобиле со тешки телесни повреди откако товарно возило удрило во полициски службеник на Фронтекс и во трактор вчера во селото Банско во струмичко.

Министерството за внатрешни работи информира дека на 13 септември околу 12:30 часот, полициски службеници од Полициската станица за граничен премин и граничен надзор Ново Село, заедно со службеници од Фронтекс, при вршење службени дејствија забележале товарно возило „Форд транзит“ со струмички регистарски ознаки, натоварено со дрва.

Возилото го управувал 33-годишниот Ф.И. од село Банско. При обид за контрола на возилото и возачот, тој го придвижил товарното возило и удрил во полициски службеник од Фронтекс од Република Полска, а потоа и во трактор „имт“ управуван од 52-годишниот Ѓ.М. од истото село.

Повреди и дополнителни утврдувања

Во несреќата со тешки телесни повреди се здобиле полицискиот службеник и возачот на товарното возило Ф.И., а повредите биле констатирани во Медицинскиот центар во Струмица.

При увидот, полициските службеници утврдиле дека возачот на тракторот го управувал возилото без положен возачки испит. Возачот на „Форд транзит“ бил лишен од слобода.

Од МВР информираат дека по целосно расчистување и документирање на случајот ќе следува соодветен поднесок.

Фото: прес-материјал од настанот