Индустриското производство во јуни порасна за 6,5% — преработувачката индустрија води

Индустриското производство во Македонија во јуни 2026 година е повисоко за 6,5 проценти во споредба со истиот месец лани, покажуваат најновите податоци. Растот главно е поттикнат од добрите резултати во преработувачката индустрија, додека рударството и секторот на енергија бележат намалување.

Преработувачката индустрија ја носи позитивната динамика

Во секторот преработувачка индустрија е регистриран раст од 7,9 проценти во јунскиот период. Наспроти тоа, рударството и ваѓањето камен бележат намалување од 3,8 проценти, додека производството во секторот снабдување со електрична енергија, гас, пара и климатизација е намалено за 8,2 проценти во однос на јуни минатата година.

Најголем придонес за растот во преработувачката индустрија имаат производството на пијалаци; тутунски производи; хемикалии и хемиски производи; други неметални минерални производи; метали и фабрикувани метални производи; електрична опрема; моторни возила, приколки и полуприколки; како и производството на мебел.

Според главните индустриски групи, најголем раст е забележан кај интермедијарните производи, без енергија, од 11,7 проценти. Капиталните производи и трајните производи за широка потрошувачка пораснале за по 8,6 проценти, додека нетрајните производи за широка потрошувачка бележат раст од 2,0 проценти. Единствен пад е регистриран кај енергијата, каде производството е намалено за 11,1 проценти.

Според статистичките податоци, најголемо влијание врз вкупниот раст на индустриското производство во јуни имале производството на други неметални минерални производи, кое се зголемило за 35,6 проценти; производството на моторни возила, приколки и полуприколки со раст од 15,9 проценти; како и производството на електрична опрема, кое пораснало за 3,8 проценти.

На кумулативно ниво, во периодот јануари–јуни 2026 година, индексот на индустриското производство изнесува 100,9, што значи дека индустриското производство е повисоко за 0,9 проценти во споредба со првата половина од 2025 година. И покрај слабите резултати во енергетиката и рударството, домашната индустрија во јуни го задржала позитивниот тренд благодарение на преработувачкиот сектор, кој останува главен двигател на индустрискиот раст. Раст од индустриско производство од 4,1 отсто е забележан и во јули.

Фото: прес-материјал од настанот