Инспекторка од АХВ уапсена за мито од 300 евра

Инспекторка од Агенцијата за храна и ветеринарство е приведена откако, како што соопштија надлежните, барала мито од 300 евра од сопственик на сендвичарница за да не му биде изречена казна. Апсењето се извршило на бензинска пумпа во Автокоманда, каде што била фатена со парите.

Случајот отворен по пријава

„Од страна на полициски службеници од Одделот за сузбивање на организиран и сериозен криминал при МВР во координација со ОЈО Скопје лишено од слобода е лице вработено во Агенцијата за храна и ветеринарство по претходна пријава дека на сопственик на угостителски објект му биле побарани парични средства за да не му биде изречен прекршок кој што му бил констатиран при контрола во објектот“, информираа од МВР.

Според наводите на истрагата, предметот на проверка бил мала сендвичарница и инспекторката побарала одредена документација и стандарди кои објектот не требало да ги поседува. Полицијата наведува дека побарувањето на средства било поврзано со избегнување на изрекување на констатиран прекршок при контрола.

Како што е дознаено, инспекторката работела во Секторот за храна од неживотинско потекло и во последните месеци брзо напредувала во кариерата, откако претходно била помлад соработник. Таа била и на советничка листа на локалните избори во една од скопските општини.

Агенцијата за храна и ветеринарство засега ниту негира ниту потврдува детали, бидејќи истрагата е во тек. Обвинителството најави дека утре ќе соопшти повеќе информации за случајот.

Полицијата нагласува дека постапката е отворена по поднесена пријава и дека следуваат натамошни процесуални дејства додека трае истрагата.

Фото: Unknown authorUnknown author / Wikimedia Commons (Public domain)