Италијанската полиција ги најде украдените дела од Реноар, Сезан и Матис вредни 29 милиони евра

Италијанската полиција ги пронајде сликите од Огист Реноар, Пол Сезан и Анри Матис, вредни 29 милиони евра, кои беа украдени од италијански музеј во март.

Делата беа однесени од вилата на Фондацијата „Мањани-Рока“, во близина на Парма, на северот на Италија, во грабеж кој траел помалку од три минути.

Брза кражба, насочена истрага

Началникот на полицијата во Парма, Андреа Паљаро, изјави дека истрагата била насочена кон деветчлена банда осомничени лица од Молдавија. Петмина од нив се обвинети дека ја извршиле кражбата, рече тој.

На видеоснимките што ги објави полицијата се гледаат двајца крадци со челни лампи и со покриени лица како влегуваат во вилата откако скршиле прозорец. Тие веднаш се упатиле кон просторијата каде што биле изложени трите слики, ги симнале од ѕидот и ги предале преку прозорецот на соучесник кој чекал надвор.

Украдените дела се: „Риба“ од Огист Реноар, „Мртва природа со цреши“ од Пол Сезан и „Одалиска на терасата“ од Анри Матис. Полицијата не соопшти каде точно биле задржани пронајдените слики додека продолжува истрагата.

Јавните обвинители и полицијата во Парма продолжуваат со напорите да ја расветлат мрежата зад кражбата, евентуалните купувачи и точниот тек на настаните од март.

Фото: АП)