Берн: Стотици мажи протестираа против насилството врз жените
Собирот пред парламентот ги повика граѓаните и училиштата да се вклучат во борбата против растечката маносфера и мизогинијата.
Стотици мажи се собраа во Берн за да го осудат бранот на насилство врз жените и да повикаат мажи да преземат поголема и поодговорна улога во спречувањето на тие појави. Собирот пред зградата на парламентот се одржа под името „Мажи против насилството врз жените“.
Организаторите велат дека протестот е реакција на зголемената загриженост поради мизогинијата која се шири во онлајн просторот, особено меѓу тинејџерите и младите мажи. Настанот требаше да покаже дека дел од машката јавност ја одбива таа матрица и сака да ја оспори јавно.
Истражување, објавено во јуни од Универзитетот во Цирих и швајцарските здруженија на мажи и татковци „mencare“, покажа дека половина од испитаниците на возраст од 18 до 24 години изразиле загриженост оти „вистинските мажи се сè повеќе маргинализирани во општеството“, а исто така покажале и „рестриктивен поглед на машкоста, заснован на доминација“.
Студијата укажува на потребата од „систематска дебата на ниво на целото општество за идеалите за машкост кои поттикнуваат насилство. Оваа дебата треба да започне во училиштата“, апел што демонстрантите го повторија на собирот.
Целта на движењето, според организаторите, е да им ги „отвори очите“ на младите мажи кои се длабоко навлезени во т.н. „маносфера“ и, пошироко, во патријархатските ставови.
„Ние, мажите, сме дел од проблемот – проблемот на насилство врз жените и квир‑лицата“, изјави Кристоф Гостели, 42‑годишен социјален работник и коорганизатор на демонстрациите „Мажи против насилството врз жените“ во рамките на групата „Maenner“. „Затоа е важно да заземеме став и да кажеме: ’Веќе не сакаме да бидеме дел од проблемот; сакаме да бидеме дел од решението‘“, додаде тој.
Фото: прес-материјал од настанот
