Iva Mihailova kaloi kufirin Maqedoni–Bullgari pavarësisht sekuestrimit të dokumenteve

Iva Mihailova, shtetase me dyfish shtetësi maqedono‑bullgare që po gjykohet në Gjykatën Themelore në Koçani për një aksident trafiku me pasoja vdekjeje, ka lënë Maqedoninë e Veriut së bashku me avokatin e saj, edhe pse në kuadër të procesit i ishin sekuestruar dokumentet e identitetit si masë paraprake.

Sipas Mihailovës, ajo u kthye në Bullgari për shkak të gjendjes së përkeqësuar shëndetësore: "Ne kaluam kufirin me avokatin tim. Shëndeti im u përkeqësua, ai më mori dhe u kthye në Bullgari pa asnjë problem. Në kufi e tregova kartën time maqedonase të identitetit. Ndihem e sigurt në Bullgari. Në Maqedoninë e Veriut u përndoqa për shkak të prejardhjes time bullgare dhe kjo ishte një nga arsyet pse më akuzuan," tha ajo. Seanca e radhës në proces është caktuar për 9 nëntor.

Avokati i saj, Nikolaj Dimitrov, refuzoi të tregojë përmes cilit pikëkalim kaluan, duke thënë se nuk dëshironte t'u krijonte probleme njerëzve që, sipas tij, i ndihmuan. Dimitrov pranoi se veprimet e tyre mund të përbëjnë shkelje të masave të përcaktuara ndaj Mihailovës, por tha se e drejta për trajtim mjekësor ishte parakushti vendimtar në vendimmarrje. "Kjo situatë është e papërballueshme dhe ne morëm fatin tonë në dorë," deklaroi avokati.

Ministria bullgare: nuk jemi njoftuar paraprakisht

Ministria e Punëve të Jashtme të Bullgarisë njoftoi se nuk ishte informuar paraprakisht dhe se nuk kishte qenë pjesë e organizimit të kthimit të saj. "Avokati hyri në kontakt me Ministrinë e Punëve të Jashtme pak para deklaratës së tij publike. E kuptojmë shqetësimin e familjes lidhur me shëndetin e Iva-s. Më e rëndësishmja tani është që ajo të marrë kujdesin mjekësor të nevojshëm. Bullgaria ka mbështetur në mënyrë të vazhdueshme përpjekjet që Iva të marrë trajtimin e nevojshëm. MPJ do të vazhdojë të ofrojë ndihmë lidhur me rastin brenda mandatit të tij," thuhej në njoftim.

Institucionet e Maqedonisë së Veriut ende nuk kanë dhënë konfirmim të mënyrës se si Mihailova kaloi kufirin, ndërkohë që i ishin sekuestruar dokumentet personale. Është kërkuar përgjigje nga Ministria e Punëve të Brendshme se a e ka lënë vendin me dokumente personale dhe përmes cilit pikëkalim, përgjigje të cilat priteshin gjatë ditës.

Kjo ngjarje ngre pyetje nëse bëhet fjalë për një mangësi në shërbimet kufitare, për probleme në zbatimin e masave nga gjykata apo për rrethana të tjera; zyrtarët duhet të sqarojnë rrethanat para seancës së nëntorit.

Foto: Arhiva