Јаневска: Најдобрите студенти, со одликувања, ќе имаат предност при вработување на факултетите

Министерката за образование и наука Весна Јаневска денеска изјави дека најдобрите студенти, наградени со признанија како „Инженерски престен“ или други одликувања за успех, ќе имаат предност при вработување на факултетите. Тоа го кажа на отворањето на IV Интернационален медицински конгрес, во организација на Факултетското студентско собрание при Медицинскиот факултет на Универзитетот „Св. Кирил и Методиј“ – Скопје.

Пакет од три предлог-закони и кадровски политики

Јаневска поврза оваа предност со новата концепција за наука и високо образование, која е преточена во пакет од три предлог-закони што се во парламентарна постапка. Таа рече дека очекува законските решенија да бидат донесени од законодавниот дом до крајот на годината и дека ќе ја отвораат патеката за подобри можности за професорите, научниците, истражувачите и истражувачкиот подмладок во високите учебни институции.

Во говорот на конгресот министерката нагласи дека во високото образование и во научно-истражувачката работа особено важни се меѓународните вмрежувања и мобилноста, кои, според неа, се единствениот начин за размена на искуства, усвојување добри практики и за реализација на заеднички проекти.

Јаневска додаде дека откако нејзиниот тим ја превзел функцијата пред две години, Владата презела крупни мерки кои ги раздвижиле научно-истражувачките активности во земјата.

„За две години буџетот за наука го зголемивме повеќе од двојно. Во 2025 година финансиравме педесетина научно – истражувачки проекти од јавен интерес, во вкупна вредност од 6 милиони евра, a за нашите професори, научници и студенти обезбедивме бесплатен пристап до познатите глобални научни бази – Web of science и Scoopus“, рече Јаневска.

Министерката посочи и дека со Здружениот истражувачки центар на Европската комисија е зајакната соработката, што отворило пристап до лабораториите за македонскиот научен кадар. Таа исто така нагласи дека под покровителство на Центарот минатиот месец во земјата била организирана првата летна научна школа за земјите од Западен Балкан. Како лекар и професорка на Медицинскиот факултет, Јаневска им посака успешен конгрес и ги повика професорите и студентите да продолжат да придонесуваат во развојот на медицинската наука и здравствениот систем.

Фото: Министерство за образование и наука