Janevska: Konstatime për parregullsi në ushqyerjen e nxënësve, ministria do të dërgojë rekomandime
Janevska tha se rekomandimet nga studimi i përbashkët me UNICEF dhe organizata joqeveritare do të shpërndahen në të gjitha shkollat për të përmirësuar ushqimin e nxënësve.
Ministrja e Arsimit Vesna Janevska tha se një studim i përbashkët i Ministrisë së Arsimit, UNICEF-it dhe disa organizatave joqeveritare zbuloi parregullsi në ushqyerjen e nxënësve, dhe se ministria së shpejti do t'u dërgojë rekomandime për ushqimin të gjitha shkollave në vend.
"E kuptoj që fëmijët ndoshta preferojnë chipsa, smoki, biskota, por ju rekomandoj që një dardhë, një mollë, një banane janë po aq ushqim i shëndetshëm, dhe për këtë duhet të kujdesen shkollat dhe komuna që t'ua mundësojnë," tha Janevska gjatë vizitës në dy palestra të rikonstruktuara shkollore në Shtip dhe në Karbinç.
Ajo shpjegoi se rekomandimet do të burojnë nga gjetjet e studimit dhe kanë për qëllim të ndihmojnë shkollat në promovimin e ushqimit më të shëndetshëm për nxënësit.
Gjatë hapjes së palestrës së rinovuar në Shkollën Fillore "Dimitar Vlahov" në Shtip — e para shkollë në komunë që mori vendim për ndalimin e telefonave mobil — Janevska vuri në dukje se shumë shkolla në vend tashmë kanë marrë masa kufizuese për përdorimin e telefonave.
"Në shumë shkolla, telefonat vendosen anash para orës dhe mendoj se kjo është e drejtë, sepse vëmendja e fëmijëve duhet të jetë e përqendruar në mësim, te mësuesi dhe te libri para tyre. Mund të ketë përjashtime kur fëmijët duhet t'i përdorin telefonat për të realizuar një temë mësimore. Por kjo duhet të kontrollohet rreptësisht nga mësuesi dhe më pas ato të kthehen aty ku nuk do të jenë të aksesueshme," tha ajo.
Dejan Zdravkov, drejtori i "Dimitar Vlahov", tha se reagimet nga prindërit, mësuesit dhe vetë fëmijët kanë qenë pozitive pas futjes së ndalimit për telefonat dhe kufizimeve për ushqimet e pashëndetshme. "Marrim reagime edhe nga prindërit, edhe nga mësuesit, edhe nga vet fëmijët. Komunikimi është përmirësuar, komunikimi fizik. Ata nuk ecin më me kokë të përkulur nëpër korridore dhe në oborrin e shkollës. Kjo u vendos në përputhje me Këshillin e Prindërve," tha Zdravkov.
Foto: material shtypi nga ngjarja
