Јустина Широка‑Пуља избрана за претседателка на Косово

Собранието на Косово синоќа ја избра Јустина Широка‑Пуља за претседателка на државата, во гласање кое заврши 13 минути пред истекот на уставниот рок и со тоа го отстрани ризикот од нови предвремени избори.

Широка‑Пуља беше избрана уште во првиот круг со 81 глас „за“, што е минималниот број потребен во оваа фаза. Нейната противкандидатка, универзитетската професорка Елјиза Хоџа, доби еден глас, додека два гласа беа прогласени за неважечки.

Парламентарни случувања и поддршки

За кандидатка за претседателка ја предложи премиерот Албин Курти, а претседателот на Демократската партија на Косово, Бедри Хамза, претходно изјави дека ја поддржува нејзината кандидатура. Пред изборот, пратениците го усвоија Законот за изменување и дополнување на Законот за специјализираните совети и специјализираното обвинителство со 88 гласа „за“.

По полагањето на заклетвата таа изјави: "Овој мандат не припаѓа само на една личност. Тој им припаѓа на сите граѓани. Јас ќе бидат претседателка на сите граѓани. Косово мора да напредува како демократска, безбедна држава со јасна евроатлантска ориентација и силно пријателство со нашите сојузници. Верувам во Косово и во неговиот народ. Верувам дека заедно можеме да изградиме подобра иднина за генерациите што доаѓаат", рече таа.

Широка‑Пуља е економистка и академик; во декември 2025 година беше избрана за претседателка на Академијата на науките и уметностите на Косово (АСХАК), станувајќи првата жена на чело на институцијата основана во 1975 година.

Родена е во 1953 година во Приштина, каде го завршила основното и средното образование. Во 1976 година дипломирала на Економскиот факултет на Универзитетот во Приштина. Во 1984 година ги завршила постдипломските студии од областа на теоријата и политиката на економскиот развој во Загреб, а докторирала на Универзитетот во Приштина. Во нејзината биографија се наведени и постдокторски студии на Универзитетот во Линц и на Универзитетот во Аризона.

Во периодот 2008–2011 година била министерка за енергетика и рударство како кадар на Демократската партија на Косово, а од 2011 до 2014 година била пратеничка во Собранието на Косово. Активна е и во граѓанскиот сектор, работела на прашања поврзани со зајакнувањето на жените, родовата еднаквост, развојот на бизнисот и претприемништвото.

Фото: Принтскрин