„Како да ги чека змија лутица, а не највредниот дел од историјата": администраторот на страницата „Ѓорѓи Колозов“ со остра критика до МРТ

Администраторот на фејсбук‑страницата „Ѓорѓи Колозов“, Горан Марковски, упати остра јавна критика до Македонската радио‑телевизија (МРТ), обвинувајќи ја јавната услуга дека со години ја запоставува својата аудиовизуелна архива и не покажува реален интерес за нејзина дигитализација и повторно прикажување.

Марковски предупредува дека бесценетите ленти собираат прав додека едни и исти емисии се вртат во програмата

Во долга објава на Фејсбук тој пишува дека до последен момент се надевал дека МРТ повторно ќе стане гордост на нацијата, но дека е разочаран од, како што вели, стабилниот пад на телевизијата. „Кое разочарување! Бев еден од оние луѓе што до последен момент негуваа надеж и искрено веруваа дека повторно Македонската радио‑телевизија ќе стане гордост на нацијата. Изгледа сум се излажал. Навистина не знам кој е најголемиот виновник за сè поуспешното тонење кон дното на оваа телевизија. Дали актуелната власт, или сите власти што се сменија од осамостојувањето до денес?“, напиша Марковски.

Тој потсетува дека некогашната Телевизија Скопје — денешна Македонска телевизија — била една од најдобрите телевизиски куќи на овие простори, со голема продукција на серии, документарни филмови, образовни и детски емисии. „Одговорно тврдам дека некогашната Телевизија Скопје, денешна Македонска телевизија, беше една од најдобрите телевизиски куќи на овие простори. Снима безброј телевизиски серии, документарни филмови, ТВ‑драми, емисии и играни филмови. Во оваа зграда се чува бесценета архива – материјали што се дел од нечие детство, нечие растење и колективната меморија на Македонија. Радиодрами, детски емисии, образовна и училишна програма, синхронизирани серии и цртани филмови со незаборавните гласови на Дади, Мешко, Руси, Трајче Георгиев, Билјана Беличанец, Славица Јовановска… Тука се „Приказните“, „Ѕвон“, „Македонски балади“… Едно чудо од документарци, музички емисии, серии, прилози, култни емисии. Богатство што со години може да се прикажува, и повторно да не се исцрпи сосем.“

Марковски наведува дека, наместо да се користи таа ризница, стотици емисии лежат по депоата додека програмата постојано повторува речиси истите дваесетина содржини. Тој го критикува и практикувањето да се вклучуваат исечоци симнати од YouTube наместо да се користат материјали од сопствената архива. „Македонската телевизија денес е само бледа сенка на тоа што некогаш беше. Цела деценија се врти речиси истата програма. Истите дваесетина содржини се повторуваат во круг, додека стотици други лежат заборавени по депоата. И замислете до каде дојдовме – во сопствените емисии да се користат инсерти симнати од YouTube, наместо материјали од сопствената архива. Тоа е најголемата трагедија.“

Тој вели дека со години безуспешно се обидува да воспостави контакт со надлежните во МРТ и илустрира колку е фрустрирачко тоа: „Повеќе верувам дека ќе се сретнам со првиот човек на САД, претседателот Доналд Трамп, и ќе испијам кафе во Белата куќа, отколку дека ќе добијам некој надлежен од МТВ што ќе сака да разговара за архивата и програмата. Некој што ќе ги сослуша нашите барања и конечно ќе преземе нешто за зачувување и оживување на ова бесценето богатство. Едноставно, тие луѓе се недостижни. Ако воопшто постојат.“

И покрај острата критика, Марковски истакнува дека сè уште верува дека МРТ може да се врати како вистински јавен сервис, ако почне сериозна дигитализација на архивата и тоа богатство повторно им се врати на граѓаните. На крајот ги повикува денешните руководители на телевизијата да ја пресечат тишината и да почнат процедури за заштита и оживување на архивата.

Фејсбук‑страницата „Ѓорѓи Колозов“, чиј администратор е Марковски, со години објавува архивски снимки, фотографии и содржини поврзани со македонската телевизија, филм и театар со цел да го зачува сеќавањето на дел од најзначајното домашно аудиовизуелно наследство.

Фото: Wikimedia commons