„Kanzlertausch“ — може ли Мерц да биде заменет по септемвриските избори?

Во ЦДУ растат гласините дека позицијата на канцеларот Фридрих Мерц може да зависи од исходот на септемвриските регионални избори.

Иако дел од партиските структури се надеваа на смирување по летниот одмор, зад сцената се зголемува бројот на функционери кои веруваат дека се неопходни промени доколку ЦДУ претрпи тешки порази, особено во источните сојузни покраини.

Анкетите покажуваат дека крајнодесничарската Алтернатива за Германија (АфД) бележи раст и на национално ниво има околу 28 проценти поддршка; партијата има реална шанса да освои апсолутно мнозинство во Саксонија-Анхалт на изборите кои ќе се одржат на 6 септември, а силна позиција има и во Мекленбург-Западна Померанија и во Берлин, каде гласањето е закажано за 20 септември.

Наследник, преседани и ризици

Како најчесто споменуван можен наследник се јавува премиерот на Северна Рајна-Вестфалија, Хендрик Вуст. Извори во партијата велат дека довербата во лидерските способности на Мерц опаѓа и дека исходот од изборите на истокот ќе биде клучен за неговата судбина.

Замена на актуелен канцелар од истиот политички блок би била исклучително ретка: во повоената историја такви трансфери се случиле само трипати — во 1963 кога Конрад Аденауер ја предаде функцијата на Лудвиг Ерхард, во 1966 по распадот на владината коалиција на Ерхард и во 1974 кога Вили Брант поднесе оставка поради голем шпионски скандал. Политиколозите предупредуваат дека таков потег може да ја дестабилизира германската политичка сцена и дури да предизвика предвремени парламентарни избори.

И покрај притисокот, Мерц сè уште има поддршка од некои од највлијателните личности во конзервативниот блок. Маркус Зедер јавно порача: „Замена на канцеларот би ги фрлила конзервативците во целосен хаос. Тоа би можело дури и да доведе до нови избори, а секој што сега посакува нови избори всушност им помага на радикалите да дојдат на власт“, изјави Маркус Зедер.

Сепак, рејтингот на Мерц е многу низок: според последното истражување ARD-DeutschlandTrend, само 13 проценти од Германците се задоволни од неговото работење — најниска оценка за актуелен германски канцелар во речиси три децении од спроведувањето на ова мерило. Главни причини за незадоволството се успорената економија и скепсата кон најавените реформи во пензискиот и здравствениот систем, кои многумина ги гледаат како дополнително финансиско оптоварување за граѓаните.

Фото: EPA-EFE/HANNIBAL HANSCHKE