Каролина во црно: моден спектакл на „Вкуси го југот“ во Гевгелија

Македонската поп-дива Каролина Гочева ги освои сцената на фестивалот „Вкуси го југот“ во Гевгелија, изведувајќи низа од нејзините најпознати хитови пред полна публика.

Покрај музиката, големо внимание предизвика и нејзиниот целосно црн, модерен стајлинг — минималистички, но сценски наменет.

На сцената Каролина се појави во корсет-топ со тенки бретели и впечатлив cut-out детал под градите, комбиниран со панталони со висок струк и широки ногавици, украсени со суптилен појас во истиот тон. Тоа ја истакна нејзината линија и ѝ овозможи слобода при движењето.

Косата ја носеше распуштена и права, додека дискретниот накит и отворените црни штикли го заокружија монохроматското издание. За време на настапот таа постојано скокаше и танцуваше со бендот, го означи виолинистот Владимир Крстев на своите Instagram приказни и активно комуницираше со публиката.

Од бела кралска тоалета до урбано црно

Оваа современа, минималистичка комбинација доаѓа само неколку дена по спектакуларниот настап на плоштадот „Македонија“ во Скопје, каде што Каролина настапи со шпанскиот тенор Хозе Карерас и Македонската филхармонија по повод 35 години од независноста. Тогаш таа носеше раскошна бела тоалета потпишана од дизајнерот Markov.

Со овие две спротивставени, но подеднакво впечатливи изданија — од кралската бела креација до лежерниот црн сценски стајлинг — Каролина уште еднаш покажа дека нејзината харизма и моден инстинкт доминираат на секоја сцена.

Фото: прес-материјал од настанот