Кина отвори прва воздухопловна база во странство во Лаос

Со отворањето на заеднички центар за летачка обука и поддршка на аеродромот Бан Кеун, северно од Виентијан, Кина стапува со прва воздухопловна база надвор од нејзината територија, што безбедносните аналитичари го гледаат како почеток на проширување на нејзиното воено присуство.

Двете комунистички влади ја опишаа локацијата како наменета исклучиво за обука на пилотите на лаоските воздухопловни сили. Кинеското министерство за одбрана соопшти дека ќе се користи за редовни оперативни потреби на двете страни и дека објектот не е насочен против ниедна трета земја.

Зошто регионалните заклучоци се важни

Аналитичарите потсетуваат дека Пекинг интензивно работи на зацврстување на влијанието во Индо-пацификот, каде се натпреварува со Вашингтон и неговите сојузници за клучните поморски коридори и подводните ресурси. Под водство на Си Џинпинг, кинеската армија се модернизира и растат тензиите околу Тајван.

Џошуа Курланцик, експерт за Југоисточна Азија од американскиот Совет за надворешни односи, ја опиша локацијата како „првата воздухопловна база што Кина ја има надвор од својата територија“ и оцени дека Пекинг веројатно ќе воспостави повеќе такви објекти додека тестира како функционираат. Истражувачот за безбедност Колин Кох вели дека, како најголем кредитор на Лаос, Кина ја користи одбранбената дипломатија за да го прошири своето присуство и дека обуката на локалните пилоти неизбежно ќе бара испраќање кинеска воена опрема.

Во споредба со САД, кои поседуваат неколку стотици бази низ светот, кинеското присуство во странство сè уште е далеку помало. Податоците на СИПРИ покажуваат дека Кина троши околу една третина од американскиот воен буџет. Првата прекуокеанска база на Пекинг беше отворена во 2017 година во Џибути, близу Црвеното Море и Аденскиот Залив, а подоцна беше проширена со центр за следење сигнали.

Пекинг исто така ја финансираше обновата на поморската база Реам во Камбоџа и лани со камбоџанските власти отвори заеднички логистички и тренажен центар, што Вашингтон го оцени како стратегиска позиција блиску до Јужното Кинеско Море. Ниту една од двете влади не објави детали за опремата и бројот персонал на новата локација во Лаос. Состојбата ја следат САД и регионални земји како Ветнам и Тајланд, а Пентагон минатата година процени дека Пекинг разгледувал отворање објекти во околу дваесетина држави, иако тогаш Лаос не беше споменат.

Фото: Максар)