Ќерката на Деко, Магдалена Јованова, прв сведок на одбраната на судењето за „Пулс“
Одбраната ќе повика 16 сведоци; Јавното обвинителство реагира дека листата е доставена на рочиштето.
Магдалена Јованова, ќерката на Дејан Јованов – Деко, се очекува да биде првиот сведок на одбраната на денешното судско рочиште во предметот за трагедијата во кочанската дискотека „Пулс“.
Реакции и листа на сведоци
Јавното обвинителство реагираше откако листата со сведоци на одбраната ја доби дури на самото рочиште, оценувајќи дека таквото постапување ги нарушува правата на еднаквост на страните во постапката. Обвинителите посочуваат дека Јованов не смее да добие привилегиран третман, без разлика дали е првообвинет или последен обвинет во предметот.
Адвокатката на Јованов образложи дека сведоците биле повикани за истото рочиште за да може нивното сослушување да започне веднаш по распитот на вештаците и да не се губи време во постапката.
Таа информираше дека од првичната листа повлекува четворица сведоци, па одбраната сега ќе повика вкупно 16 лица кои треба да сведочат во прилог на одбраната на Јованов. Помеѓу предложените сведоци се лица од Општина Кочани, припадници на Министерството за внатрешни работи, пожарникари, како и луѓе кои учествувале во реновирањето на дискотеката „Пулс“.
Судењето продолжува со доказната постапка на одбраната.
Фото: Chesta1313 / Wikimedia Commons (CC BY-SA 4.0)
