Komisioni miraton Projekt‑Rezolutën për politikën migratore 2026–2030

Zëvendësministri i Punëve të Brendshme, Astrit Iseni, tha se qëllimi i përgjithshëm i rezolutës është të krijojë parakushtet institucionale dhe të tjera për zhvillimin e një kornize të qëndrueshme dhe gjithëpërfshirëse për menaxhimin e migrimeve të ligjshme dhe të paligjshme, në funksion të përparimit të vendit.

Ai theksoi: "Rezoluta do të zbatohet në gjashtë fusha strategjike, përkatësisht kornizë mbështetëse, të dhëna të besueshme dhe të përditësuara, menaxhim i migracionit të ligjshëm, menaxhim i migracionit të paligjshëm, hyrja dhe qëndrimi i të huajve në Republikën e Maqedonisë së Veriut dhe ndërtimi i partneriteteve për përmirësimin e bashkëpunimit ndërkombëtar në fushën e migracionit."

Anëtarët e komisionit e pranuan pa vërejtje rezolutën për politikën migratore për periudhën 2026–2030. Në të njëjtën seancë u miratuan edhe ndryshimet e Statutit të Akademisë Ushtarake "Gjeneral Mihajlo Apostolski" në Shkup, anëtare shoqëruese e Universitetit "Goce Dellçev" në Shtip.

Dekani i akademisë, Kolonel Nenad Taneski, sqaroi se me zhvillimin e Akademisë Ushtarake u shfaq nevoja për zgjerim të veprimtarisë dhe për formimin e një Instituti për Shkenca Ushtarake. Ai tha: "Me zhvillimin e Akademisë Ushtarake 'Gjeneral Mihajlo Apostolski' u evidentua nevoja për rritje të veprimtarisë, pra formimin e një Instituti për Shkenca Ushtarake. Statuti përfaqëson një proces zhvillimor për të vazhduar aktivitetet tona për të cilat kemi mbështetjen maksimale nga ministri i Mbrojtjes i cili tregoi dhe provoi se Ushtria dhe Ministria e Mbrojtjes, dhe Akademia Ushtarake janë një faktor shumë i rëndësishëm në zhvillimin e kadrës oficerëshe."

Komisioni gjithashtu raportoi se ka marrë një opinion pozitiv nga Qeveria e Maqedonisë së Veriut për ndryshimet në statutin e akademisë.

Foto: material shtypi nga ngjarja