Комунални редари од денеска во општина Бутел
Редари во униформи и со службено возило ќе патролираат секојдневно и ќе примаат пријави на 076 202 793.
Од 11 ноември 2026 година, на територијата на Општина Бутел официјално започнуваат со работа комуналните редари кои ќе патролираат и ќе реагираат на пријави за нарушување на јавниот ред, јавната чистота и оштетување на општинскиот имот.
Како ќе работат редарите
Градоначалникот Дарко Костовски соопшти дека редарите ќе бидат присутни на терен секојдневно во сите населени места во општината. За полесно и побрзо дејствување, тимот ќе биде унифициран и ќе располага со службено возило.
Во опсегот на нивните обврски е грижа за јавната чистота, заштита на зелените и другите јавни површини, спречување вандализам и несовесно однесување, како и заштита на општинскиот имот. Општината најави зголемена контрола и побрзо постапување по пријавите од граѓаните.
Граѓаните ќе можат директно да пријавуваат комунални проблеми на посебниот телефонски број 076 202 793, со цел службата да добие порано информации од терен и да реагира навремено.
Костовски истакна дека воведувањето на редарите е дел од напорите за зголемување на одговорноста и грижата за јавниот простор со цел Бутел да стане почиста и поуредена општина.
„Нашата цел е јасна: ред во секое населено место, заштита на она што е заедничко и брза реакција на терен!“, порача градоначалникот Костовски во објавата на социјалните мрежи.
Фото: прес-материјал од настанот
