Општина Струга останува со блокирана сметка и покрај намалувањето на долгот за 2,5 милиони евра

И покрај најавите за раздолжување и воведување ред во општинската каса, Општина Струга и натаму останува на листата општини со блокирани сметки. Градоначалникот Менди Ќура денеска се пофали со намалување на долгот за 2,5 милиони евра откако ја презел функцијата и изрази уверување дека до крајот на годината сметките ќе бидат одблокирани.

Критики од опозицијата

Ќура истакна дека финансиските текови се во позитивна насока и дека процесот на финансиска консолидација е во завршна фаза. Тој како еден од поголемите успеси на новата локална власт го посочи и воведувањето ред во општинската администрација и нагласи дека е ставен крај на практиката од претходното раководство кога „одредени лица земале плата без воопшто да се појават на своето работно место.“

Од редовите на опозицијата дојде поинаква слика. Тие тврдат дека граѓаните не гледаат реална корист од ветувањата и посочуваат дека досега е реализирано само 5 проценти од предизборната програма. Според нив, Струга сѐ уште ги чека клучните проекти како катната гаража, уредувањето на плажите и новото пристаниште.

Градоначалникот одговори дека капиталните инвестиции бараат време и подобро планирање, и повика на трпение додека подолготрајните проекти се подготват и се распишуваат постапки за јавни набавки. Жителите бараат темпото на работа и позитивните финансиски извештаи побрзо да се почувствуваат и на терен.

За сега, и покрај пријавеното намалување на долгот, Општина Струга останува со блокирана сметка, што ги остава локалните услуги и исплатите зависни од државните процедури за одблокирање и продолжување на мерките за консолидација што ги најави локалната власт.

Фото: прес-материјал од настанот