Кризата во Германија ја крати работната сила во фабриката „Мода“ — 78 отпуштени и загуба од 192.000 евра

Кризата на германскиот пазар се одрази директно врз текстилната фабрика „Мода“ од Свети Николе: компанијата во првите девет месеци од 2026 пријави намалување на бројот на вработени за 78 лица и нето-загуба од околу 192.000 евра.

Според финансискиот извештај објавен на Македонската берза, бројот на вработени се намалил од 308 во јануари на 230 во септември, што претставува пад од над 25 проценти. За работниците кои доброволно прифатиле технолошки вишок, компанијата исплатила околу 170.000 евра отпремнини.

Зависност од еден партнер

Во образложението на финансиските резултати компанијата наведува: „И во 2026 година продолжи намалувањето на побарувачката од главниот партнер од Германија и таа се движи околу 2.500 парчиња дневно. Согласно намалените нарачки, дојде и до намалување на бројот на работници, така вкупниот број на работници во Септември изнесува 230 работника и е за 78 работника помалку од Јануари 2026 година.“

Проблемите се видливи и во бројките: загубата се зголемила за повеќе од 54 проценти во споредба со истиот период лани, а приходите од продажба опаднале за околу 850.000 евра — од 3,33 милиони на 2,48 милиони евра.

Од вкупно 399.195 извезени конфекциски производи, 394.538 биле наменети за германската CASA MODA, што значи дека речиси 99 проценти од извозот по број на парчиња зависи од еден партнер. Дополнителен притисок претставуваат растечките трошоци за работна сила: компанијата пријавува дека нето-платите пораснале за 274 проценти од 2014 до 2025 година, додека цените на услугите за странските партнери се зголемиле за околу 50 проценти.

И покрај намалувањето на оперативните трошоци за 15 проценти, фабриката продолжува да работи со загуба и упатува отворено предупредување за неизвесна иднина. Финансиското образложение е потпишано од Ангел Димитров, извршен директор на компанијата и претседател на Собранието на Организацијата на работодавачи на Македонија.

Производството во „Мода“ е фокусирано на машки кошули, женски блузи и заштитна облека; раководството предупредува дека намалената побарувачка во Германија, постојаниот раст на плати и нарушената конкурентност во однос на земјите од далечниот исток го загрозуваат опстанокот на компанијата.

Фото: прес-материјал од настанот