Кулата на Водно е изградена, но сè уште е затворена

Телекомуникациската кула на Водно е завршена, но останува затворена сè додека не добие употребна дозвола, соопшти Агенцијата за електронски комуникации. Градежните работи се завршени, а сега следува административна и техничка фаза пред објектот да може да се стави во функција.

На 7 октомври 2026 година бил извршен технички преглед и прием на енергетскиот приклучок на кулата, што е еден од предусловите за натамошната постапка. Овој прием го отстрани еден од важните технички предуслови, но не овозможува непосредно пуштање во употреба.

Што следува пред официјалното отворање

Во наредната фаза треба да се поднесе проектната документација за изведената состојба (as-built). По прифаќањето на таа документација ќе следува целосен технички преглед на објектот по кој може да се донесе одлука за издавање употребна дозвола.

Од АЕК посочуваат дека долготрајноста на проектот и измените во прописите во текот на повеќе од една деценија ја усложниле и успориле постапката. Засега нема конкретен датум кога кулата ќе биде официјално пуштена во употреба.

Кулата почна да се гради во 2013 година и е висока 155 метри. Основната намена е сместување телекомуникациска опрема и системи за контрола и мониторинг на радиофреквенциите. Проектот предвидува четири платформи со површина од околу 180 до 200 квадратни метри, административни простории и ротирачки панорамски ресторан со капацитет за околу 60 гости.

По добивањето на употребната дозвола објектот ќе се запише во јавните книги и ќе добие имотен лист, по што Агенцијата за електронски комуникации ќе може да ги активира телекомуникациските и инфраструктурните капацитети. Јавните, туристичките и угостителските содржини предвидени во проектот ќе бидат ставени на располагање по завршување на правните постапки.

Фото: прес-материјал од настанот