Кузеска: На сомнителен начин почна со работа српската медиумска мрежа во Македонија

Портпаролката на СДСМ, Богданка Кузеска, денеска оцени дека српската медиумска мрежа почнала со работа во Македонија на сомнителен начин и побара појаснување од регулаторите откако екипа на „Еуроњуз Македонија“ присуствувала на владина прес‑конференција без очигледна дозвола.

Како што рече, пред два дена на прес‑конференција во Владата присуствувала екипа на „Еуроњуз Македонија“, што ја отвора дилемата за третманот на овој медиум од страна на институциите.

СДСМ бара одговори од АВМУ и Финансиската полиција

„Како присуствуваат кога сè уште немаат дозвола за работа? Очигледно Владата на Мицкоски, веќе ја третира 'Еуроњуз Македонија' како телевизија и ѝ овозможува пристап на официјални владини настани. Нели беше најавена истрагата за сомнителниот влез на српската медиумска машинерија во Македонија. По реакциите на македонските телевизии беше соопштено дека Финансиската полиција отворила предмет, а АВМУ ја запрела постапката. Дали ова значи дека истрагата е прекината и се работи под радарот? Како работат медиумите на Вучиќ во Македонија? Што прави АВМУ? Или мачкаат очи? Што прави Трајчевски? Дали знае дека во наводно регулираниот простор му се шетаат медиумски пирати и дека за тоа може и кривично да одговара?"

Кузеска искажа сомнеж дека медиумите поврзани со српскиот претседател Александар Вучиќ веќе се присутни во македонскиот етер и дека ширењето на нивните пораки носи анти‑македонска и анти‑ЕУ реторика.

Таа предупреди дека конзистентните политики на Мицкоски и неговите соработници, како што рече, доведуваат до зголемено влијание на странски медиуми и најави можен „медиумски мрак“ кој, според СДСМ, ќе биде во служба на Русија и „на организираната криминална група на Мицкоски“. Кузеска додаде дека партијата дава полна поддршка на независните медиуми и новинарите и потсети на борбата против медиумскиот мрак во 2015 година, нагласувајќи дека нема да дозволат враќање на времето на Никола Груевски.

Во исто време од партијата посочија и дека „Македонија е на прво место во Европа по бројот на заболени со западнонилска треска во однос на бројот на жители.“

Фото: СДСМ